ഇടുക്കിയിൽ കാർ പുഴയിലേക്ക് മറിഞ്ഞ് മൂന്ന് മരണം

വിനോദയാത്രയ്ക്ക് പോയ മൂന്ന് പേർ കാർ പുഴയിലേക്ക് വീണ് മരിച്ചു. ഒരു കുടുംബത്തിലെ മൂന്ന് പേരാണ് മരിച്ചത്.

കൊച്ചി ധനുഷ്‌കോടി ദേശീയപാതയിൽ ഇരുമ്പുപാലം ചെറായി പാലത്തിന് സമീപം ദേവിയാർ പുഴയിലേക്കാണ് കാർ മറിഞ്ഞത്. മരിച്ചവർ തൃശൂർ അതിരപ്പള്ളി സ്വദേശികളാണ്.

മൂന്നാർ സന്ദർശനത്തിന് ശേഷം തിരിച്ച് അങ്കമാലിയിലേക്ക് പോകുമ്പോൾ നിയന്ത്രണംവിട്ട കാർ പുഴയിലേക്ക് മറിയുകയായിരുന്നു. അതിരപ്പള്ളി എലിഞ്ഞപ്ര പായിപ്പൻ വീട്ടിൽ ജോയ്, ഭാര്യ ഷാലി, ഇവരുടെ കൊച്ചു മകൾ സാറാ എന്നിവരാണ് മരിച്ചത്. ജീന ജിസ്‌ന, ജീവൻ, ജിസ്‌നയുടെ ഭർത്താവ് ജിയോ എന്നിവർക്കാണ് പരിക്കേറ്റത്. ഇവരെ അടിമാലി താലൂക്കാശുപത്രിയിൽ പ്രവേശിപ്പിച്ചു. രണ്ട് പേരുടെ നില അതീവ ഗുരുതരാവസ്ഥയിലാണ്.