‘വാട്ട്’ എ സെഞ്ചുറി!!!; ഗെയ്‌ലിന് പിന്നാലെ നൂറടിച്ച് ഷെയ്ന്‍ വാട്‌സണ്‍

ബാറ്റ് കയ്യിലെടുത്താല്‍ പിന്നെ പ്രായം മറന്നു പോകുന്നവരാണ് ചില ക്രിക്കറ്റ് താരങ്ങള്‍. ഷെയ്ന്‍ വാട്‌സനെ ടീമിലെടുക്കുമ്പോള്‍ ചെന്നൈ സൂപ്പര്‍ കിംഗ്‌സിന് ഉറപ്പായിരുന്നു പ്രായത്തിന് മുന്നില്‍ തോറ്റ് കൊടുക്കാത്ത താരമാണ് വാട്‌സനെന്ന്. ഇന്നലെ പൂനെയില്‍ നടന്ന ചെന്നൈ സൂപ്പര്‍ കിംഗ്‌സ്-രാജസ്ഥാന്‍ റോയല്‍സ് ഐപിഎല്‍ പോരാട്ടത്തില്‍ ഈ സീസണിലെ രണ്ടാമത്തെ സെഞ്ചുറി പിറന്നത് 36-കാരനായ ഷെയ്ന്‍ വാട്‌സന്റെ ബാറ്റില്‍ നിന്ന്. 38-കാരനായ ക്രിസ് ഗെയ്‌ലാണ് കഴിഞ്ഞ ദിവസം ഈ സീസണിലെ ആദ്യ സെഞ്ചുറി സ്വന്തമാക്കിയത്.

കുട്ടിക്രിക്കറ്റ് കളിക്കാന്‍ പ്രായം വിഷയമാകുമെന്ന പേടിയില്‍ ലേലസമയത്ത് എല്ലാ മാനേജുമെന്റുകളും തഴഞ്ഞ താരങ്ങളാണ് ക്രിസ് ഗെയ്‌ലും ഷെയ്ന്‍ വാട്‌സനും. ഇന്നലെ നടന്ന മത്സരത്തില്‍ 57 പന്തുകളില്‍ നിന്നായിരുന്നു ഷെയ്ന്‍ വാട്‌സണ്‍ 106 റണ്‍സ് സ്വന്തമാക്കിയത്. 9 ഫോറുകളും 6 സിക്‌സറുകളും ചേര്‍ന്നതായിരുന്നു വാട്‌സന്റെ ഇന്നിംഗ്‌സ്. വാട്‌സന്റെ സെഞ്ചുറി കരുത്തില്‍ 204 റണ്‍സാണ് ചെന്നൈ നേടിയത്. മറുപടി ബാറ്റിംഗിനിറങ്ങിയ രാജസ്ഥാന്റെ ഇന്നിംഗ്‌സ് 140 റണ്‍സില്‍ അവസാനിച്ചു. 64 റണ്‍സിന്റെ വിജയമാണ് ചെന്നൈ സ്വന്തമാക്കിയത്.