ഐ ലീഗില്‍ ചെന്നൈ സിറ്റിക്ക് കിരീടം

ഐ ലീഗ് കിരീടം ചെന്നൈ സിറ്റി എഫ്‌സിക്ക്. അവസാന മത്സരത്തില്‍ മിനര്‍വ പഞ്ചാബിനെ ഒന്നിനെതിരെ മൂന്ന് ഗോളുകള്‍ക്ക് കീഴടക്കിയാണ് ചെന്നൈ കന്നിക്കിരീടമുയര്‍ത്തിയത്.

ഇരട്ടഗോള്‍ നേടിയ ഗൗരവ് ബോറയും (69, 93) പെഡ്രോ മാന്‍സിയുമാണ്‌(56)  ചെന്നൈയെ വിജയത്തിലേക്ക് നയിച്ചത്. മൂന്നാം മിനുട്ടില്‍ റോളണ്ട് ബിലാലയുടെ വകയായിരുന്നു മിനര്‍വയുടെ ഗോള്‍.

20 മത്സരങ്ങളില്‍ നിന്നായി 13 വിജയവും നാല് സമനിലയും മൂന്ന് തോല്‍വിയും ഉള്‍പ്പെടെ 43 പോയിന്റുമായാണ് ചെന്നൈ ചാമ്പ്യന്‍മാരായത്. ലീഗില്‍ കിരീടത്തിനായി ചെന്നൈയ്‌ക്കൊപ്പമുണ്ടായിരുന്ന ഈസ്റ്റ് ബംഗാളും അവസാന മത്സരത്തില്‍ വിജയിച്ചെങ്കിലും ഒരു പോയിന്റ് വ്യത്യാസത്തില്‍ പിന്തളപ്പെട്ടു.

42 പോയിന്റുമായി രണ്ടാം സ്ഥാനമാണ് ഈസ്റ്റ് ബംഗാളിന് ലഭിച്ചത്. ഗോകുലം എഫ്‌സി ക്കെതിരെ ഒന്നിനെതിരെ രണ്ട് ഗോളുകള്‍ക്കായിരുന്നു ഈസ്റ്റ് ബംഗാളിന്റെ വിജയം.