പ്രളയകാലത്ത് പമ്പയിൽ അടിഞ്ഞുകൂടിയ മണൽ ദേവസ്വം ബോർഡിന് സൗജന്യമായി നൽകും

പ്രളയകാലത്ത് പമ്പ ത്രിവേണിയിൽ അടിഞ്ഞുകൂടിയ മണലിൽ നിന്ന് 20,000 ക്യുബിക് മീറ്റർ മണൽ തിരുവിതാംകൂർ ദേവസ്വം ബോർഡിന് സൗജന്യമായി നൽകാൻ മന്ത്രിസഭാ യോഗം തീരുമാനിച്ചു. തിരുവിതാംകൂർ ദേവസ്വം ബോർഡിന്റെ അഭ്യർത്ഥന പ്രകാരമാണിത്. ബാക്കിയുള്ള മണൽ സ്വകാര്യ ആവശ്യക്കാർക്ക് കേന്ദ്ര പൊതുമരാമത്ത് നിരക്കിൽ വിൽക്കുന്നതിന് വനം വകുപ്പിന് അനുമതി നൽകാനും തീരുമാനിച്ചിട്ടുണ്ട്.

സംസ്ഥാനത്തെ ദേവസ്വംബോർഡുകളുടെയും ദേവസ്വം മാനേജ്‌മെൻറ് കമ്മിറ്റികളുടെയും അധീനതയിലുള്ള ഭൂമിയുടെ കയ്യേറ്റങ്ങളുമായി ബന്ധപ്പെട്ട തർക്കങ്ങൾ വേഗത്തിൽ തീർക്കുന്നതിന് റിട്ട. ജില്ലാ ജഡ്ജി അംഗമായി കേരളാ ദേവസ്വം ട്രിബ്യൂണൽ രൂപീകരിക്കുന്നതിനുള്ള ബിൽ കൊണ്ടുവരാനും യോഗം തീരുമാനിച്ചു.