ബിജെപി വിരുദ്ധ പരാമർശം; വിനായകനെതിരെ ജാതീയ അധിക്ഷേപം; സിനിമകൾ ബഹിഷ്‌ക്കരിക്കാൻ ആഹ്വാനം

രാഷ്ട്രീയ നിലപാട് വ്യക്തമാക്കിയ നടൻ വിനായകനെതിരെ സൈബർ ആക്രമണം. ലോക്‌സഭാ തെരഞ്ഞെടുപ്പ് ഫലപ്രഖ്യാപനത്തിന് പിന്നാലെ വിനായകൻ നടത്തിയ അഭിപ്രായപ്രകടനങ്ങളാണ് വിമർശനങ്ങൾക്കിടയാക്കിയിരിക്കുന്നത്. വിനായകന്റെ ജാതിപറഞ്ഞും വംശീയമായും അധിക്ഷേപിച്ചവരുണ്ട്. നടന്റെ സിനിമകൾ ബഹിഷ്‌ക്കരിക്കണമെന്ന് ആഹ്വാനം ചെയ്തവരുമുണ്ട്.

ഫേസ്ബുക്കിൽ പോസ്റ്റു ചെയ്ത അഭിമുഖ വീഡിയോക്ക് താഴെയാണ് മോശം കമന്റുകൾ നിറഞ്ഞിരിക്കുന്നത്. ‘രാഷ്ട്രീയ നിലപാട് നോക്കാതെ നിന്റെ സിനിമകൾ കണ്ടു, രാഷ്ട്രീയ നിലപാട് നോക്കി അതങ്ങ് നിർത്തി’ എന്നായിരുന്നു ഒരാളുടെ കമന്റ്. ‘നീഗ്രോയുടെ മുഖം പോലെയുള്ളവൻ’ എന്ന് പറഞ്ഞ് ആക്ഷേപിച്ചവരുണ്ട്. ‘ഇനി മുതൽ നീ വിനായകൻ അല്ല, വിനായകൻ ഖാൻ ആണ്. ജയ് ഗോ മാതാ’ എന്നായിരുന്നു മറ്റൊരാളുടെ കമന്റ്. നടനെതിരെ തെറിവിളികളും ഉയർന്നിട്ടുണ്ട്.

തെരഞ്ഞെടപ്പ് ഫലപ്രഖ്യാപനത്തിന് പിന്നാലെ ഒരു മാധ്യമത്തിന് നൽകിയ അഭിമുഖത്തിലാണ് വിനായകൻ രാഷ്ട്രീയ നിലപാട് വ്യക്തമാക്കിയത്. കേരളത്തിൽ എന്താണ് സംഭവിച്ചതെന്ന് അറിയില്ലെന്നും കേരളത്തിലെ ജനങ്ങൾ ഇതേക്കുറിച്ച് തീർച്ചയായും ചിന്തിക്കണമെന്നും വിനായകൻ അഭിമുഖത്തിൽ പറഞ്ഞിരുന്നു. ബിജെപിയുടേയും സംഘപരിവാറിന്റേയും അജണ്ട കേരളത്തിലെ ജനങ്ങൾ തള്ളിക്കളഞ്ഞതിൽ അദ്ദേഹം സംതൃപ്തി പ്രകടിപ്പിച്ചിരുന്നു. ബിജെപിക്കും ആർഎസ്എസിനും കേരളത്തിൽ ഒന്നും ചെയ്യാൻ കഴിയില്ലെന്നും നമ്മളൊക്കെ മിടുക്കന്മാരാണെന്നും അതാണ് തെരഞ്ഞെടുപ്പിൽ കണ്ടതെന്നും വിനായകൻ പറഞ്ഞു. ഒരു രാഷ്ട്രീയക്കാരനായി കളത്തിൽ ഇറങ്ങില്ല, പക്ഷേ എപ്പോഴും കമ്മ്യൂണിസ്റ്റായിരിക്കുമെന്നും അദ്ദേഹം നിലപാട് വ്യക്തമാക്കിയിരുന്നു.