മെട്രോ സ്‌റ്റേഷന് സമീപം അജ്ഞാത സ്ത്രീയുടെ തലയില്ലാത്ത മൃതദേഹം

ഡൽഹി മെട്രോ സ്‌റ്റേഷന് സമീപം അജ്ഞാത സ്ത്രീയുടെ തലയില്ലാത്ത മൃതദേഹം കണ്ടെത്തി. മൃതദേഹത്തിന് രണ്ടുമൂന്നു ദിവസത്തെ പഴക്കമുണ്ടെന്ന് പൊലീസ് പറയുന്നു. ജഹൻഗിർപുരി മെട്രോ സ്‌റ്റേഷന് സമീപമാണ് സംഭവം.

സൈക്കിളിന് മുകളിൽ സ്ഥാപിച്ചിരിക്കുന്ന ഇരുമ്പുപ്പെട്ടിക്ക് അകത്ത് പുതപ്പിൽ പൊതിഞ്ഞ നിലയിലായിരുന്നു മൃതദേഹം. മൃതദേഹം അഴുകി തുടങ്ങിയ നിലയിലായിരുന്നു. തൊലി ഇളകി മാറി തുടങ്ങിയതായും പൊലീസ് പറയുന്നു.

മൃതദേഹം ബാബു ജഗജീവൻ റാം മെമ്മോറിയൽ ആശുപത്രിയിലേക്ക് മാറ്റി. ഇന്ന് പോസ്റ്റ്‌മോർട്ടം നടത്തും. അതേസമയം പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.