കുമാരസ്വാമിക്ക് അനുകൂലമായി വോട്ട് ചെയ്തില്ല; ബിഎസ്പി എംഎൽഎയെ പാർട്ടിയിൽ നിന്നും പുറത്താക്കി മായാവതി

കർണാടക മുൻ മുഖ്യമന്ത്രി എച്ച്.ഡി കുമാരസ്വാമിക്ക് അനുകൂലമായി വോട്ട് ചെയ്യാത്ത ബിഎസ്പി എംഎൽഎയെ പാർട്ടിയിൽ നിന്നും പുറത്താക്കി മായാവതി. ട്വിറ്ററിലൂടെയാണ് മായാവതി ഇക്കാര്യം അറിയിച്ചത്.

‘ കർണാടകയിൽ കുമാരസ്വാമി സർക്കാരിന് അനുകൂലമായി വോട്ട് രേഖപ്പെടുത്തണമെന്ന പാർട്ടി ഹൈക്കമാൻഡിന്റെ നിർദ്ദേശം അനുസരിക്കാതെ ഇന്ന് നടന്ന വിശ്വാസ വോട്ടെടുപ്പിൽ നിന്നും വിട്ടു നിന്ന ബിഎസ്പി എംഎൽഎ എൻ മഹേഷിന്റെ നടപടിയെ ഗൗരവമായാണ് പാർട്ടി കാണുന്നത്. അതുകൊണ്ട് തന്നെ മഹേഷിനെ പാർട്ടി പുറത്താക്കുകയാണ്’- മായാവതി ട്വിറ്ററിൽ കുറിച്ചു.

204 അംഗങ്ങളാണ് സഭയിൽ എത്തിയത്. 105 വോട്ടുകൾക്കെതിരെ 99 വോട്ടുകളാണ് കുമാരസ്വാമി സർക്കാർ നിലംപതിച്ചത്.

Read Also : കർണാടകയിൽ കുമാരസ്വാമി സർക്കാർ വീണു

2018 മെയ് മാസത്തിലാണ് കോൺഗ്രസ്-ജനതാദൾ സഖ്യംസർക്കാർ രൂപീകരിച്ചത്. തെരഞ്ഞെടുപ്പിൽ ആർക്കും വ്യക്തമായ ഭൂരിപക്ഷം ലഭിച്ചിരുന്നില്ല. സ്പീക്കർ ബിഎസ് യെദ്യൂരിയപ്പയെ സർക്കാർ രൂപീകരിക്കാൻ ക്ഷണിച്ചിരുന്നു. യെദ്യൂരപ്പ അധികാരത്തിലേറുകയും ചെയ്തിരുന്നു. ഇതിനിടെ കോൺഗ്രസ്-ജനതാദൾ സഖ്യം രൂപീകരിക്കുകയും വിശ്വാസ വോട്ടെടുപ്പിന് മുമ്പേ തന്നെ സുപ്രീംകോടതി വരെ നീങ്ങിയ നാടകങ്ങൾക്കൊടുവിൽ യെദ്യൂരപ്പ രാജിവെച്ച് കുമാരസ്വാമി അധികാരത്തിലേറുകയാണ്.