കണ്ണൂർ കോർപ്പറേഷൻ മേയർക്കെതിരെ യുഡിഎഫ് അവിശ്വാസ പ്രമേയത്തിന് നോട്ടീസ് നൽകി

കണ്ണൂർ കോർപ്പറേഷൻ മേയർക്കെതിരെ യുഡിഎഫ് അവിശ്വാസ പ്രമേയത്തിന് നോട്ടീസ് നൽകി. കോൺഗ്രസ് വിമതൻ പി.കെ രാഗേഷിന്റെ പിന്തുണ ഉറപ്പായതിനെ തുടർന്നാണ് യുഡിഎഫ് അവിശ്വാസപ്രമേയം കൊണ്ടുവരാൻ നീക്കങ്ങൾ തുടങ്ങിയിരിക്കുന്നത്. എൽഡിഎഫ് ഭരിക്കുന്ന കണ്ണൂർ കോർപ്പറേഷനിൽ മേയർ ഇ.പി.ലതയ്‌ക്കെതിരെയാണ് യുഡിഎഫ് അവിശ്വാസപ്രമേയത്തിന് നോട്ടീസ് നൽകിയത്. യുഡിഎഫിലെ 27-ൽ 26 കൗൺസിലർമാരും ഒപ്പിട്ട നോട്ടീസാണ് കണ്ണൂർ ജില്ലാ കളക്ടർ മുമ്പാകെ നൽകിയത്. ഒരാൾ വിദേശത്തായതിനാലാണ് എത്താതിരുന്നത്. കോൺഗ്രസ് വിമതനും ഡെപ്യൂട്ടി മേയറുമായ പി കെ രാഗേഷിന്റെ പിന്തുണ യുഡിഎഫ് ഉറപ്പാക്കിയിട്ടുണ്ട്.

Read Also; കെ.സുധാകരന് പിന്തുണ പ്രഖ്യാപിച്ച് കണ്ണൂർ ഡെപ്യൂട്ടി മേയർ പി.കെ രാഗേഷ്

കാലാവധി തീരാൻ ഒരു വർഷം ശേഷിക്കെയാണ് കണ്ണൂർ കോർപ്പറേഷനിലെ എൽഡിഎഫ് ഭരണസമിതിക്കെതിരെ യുഡിഎഫ് അവിശ്വാസം കൊണ്ടുവരുന്നത്. ഭരണം ലഭിച്ചാൽ ഡെപ്യൂട്ടി മേയർ സ്ഥാനത്ത് പി.കെ രാഗേഷിനെ നിലനിർത്തിക്കൊണ്ട് മേയർപദവി കോൺഗ്രസും ലീഗും പങ്കിടും. ആദ്യം കോൺഗ്രസിലെ സുമ ബാലകൃഷ്ണൻ മേയറായേക്കും. ലീഗിൽ സി.സീനത്തിന്റെ പേരാണ് ഉയർന്നുവന്നത്. അമ്പത്തിയഞ്ചംഗ കോർപ്പറേഷനിൽ കോൺഗ്രസ് വിമതൻ പി.കെ.രാഗേഷടക്കം ഇരുപത്തിയെട്ട് പേരുടെ പിന്തുണയിലാണ് നിലവിൽ എൽ.ഡി.എഫ് ഭരിക്കുന്നത്.