മഴക്കെടുതിയിൽ ഓണത്തിന്റെ നിറം കെടില്ല; ഓണച്ചന്തകൾ വഴി സബ്‌സിഡി നിരക്കിൽ സാധനങ്ങൾ ലഭിക്കും

മഴക്കെടുതിയിൽ ഓണം ആഘോഷങ്ങളുടെ നിറം കെടാതിരിക്കാനുള്ള നടപടികളുമായി സംസ്ഥാന സർക്കാർ. അവശ്യ സാധനങ്ങൾ സബ്സിഡി നിരക്കിൽ ലഭ്യമാക്കാനുള്ള ഒരുക്കങ്ങൾ നടന്നു കൊണ്ടിരിക്കുകയാണ്. സപ്ലൈകോ, കൺസ്യൂമർഫെഡ്, ഹോർട്ടികോർപ്‌, വിഎഫ്പിസികെ തുടങ്ങിയവകളുടെ ഓണച്ചന്തകൾ വഴി കുറഞ്ഞ നിരക്കിൽ പലവ്യഞ്‌ജനങ്ങളും പച്ചക്കറികളും ലഭിക്കും.

സെപ്‌തംബർ ഒന്നു മുതലാണ് മേളകൾ തുടങ്ങുന്നത്. സപ്ലൈകോ ഓണച്ചന്തകളിൽ ഹാൻടെക്സ്, ഹാൻവീവ്, മത്സ്യഫെഡ്, മീറ്റ്പ്രൊഡക്ട് ഓഫ് ഇന്ത്യ, കയർഫെഡ്, വനശ്രീ, വ്യവസായ വകുപ്പിന് കീഴിലുള്ള സ്ഥാപനങ്ങൾ, വനിതാ വികസന കോർപറേഷൻ സ്റ്റാളുകളും ഉണ്ടാവും.

കൃഷിവകുപ്പിന്റെയും ഹോർട്ടികോർപിന്റെയും ആഭിമുഖ്യത്തിൽ 2000 ഓണച്ചന്തകൾ ഒരുക്കാനാണ് തീരുമാനം. കൃഷിവകുപ്പ്- 1350, ഹോർട്ടികോർപ്‌- 450, വെജിറ്റബിൾ ആൻഡ്‌ ഫ്രൂട്ട് പ്രൊമോഷൻ കൗൺസിൽ- 200 എന്നിങ്ങനെയാണ്‌ ചന്തകൾ തുടങ്ങുക. കർഷകർക്ക് 10 ശതമാനം കൂടുതൽ വില നൽകി പച്ചക്കറികൾ ശേഖരിച്ച് പൊതുജനങ്ങൾക്ക് 10 മുതൽ 20 ശതമാനംവരെ കുറഞ്ഞ നിരക്കില്‍ ലഭ്യമാക്കും.

കൺസ്യൂമർഫെഡിന്റെ ഓണം സഹകരണ വിപണികൾ സെപ്‌തംബർ ഒന്നിന്‌ ആരംഭിക്കും. 200 ത്രിവേണി മാർക്കറ്റും 3300 സഹകരണ സംഘവും ഉൾപ്പടെ 3500 വിപണികളാണ്‌ പ്രവർത്തിക്കുക. പൊതുവിപണിയിലുള്ളതിനെക്കാൾ പകുതിയോളം വില കുറച്ച് 13 ഇനം സബ്‌സിഡി സാധനങ്ങൾ ലഭിക്കും. സഹകരണ മേഖലയിൽ ഉൽപ്പാദിപ്പിക്കുന്ന വിവിധ ബ്രാൻഡുകളും കേരഫെഡിന്റെ വെളിച്ചെണ്ണയും ലഭിക്കും. 10 മുതൽ 30 ശതമാനംവരെ വിലക്കുറവുണ്ടാകും.

14 ജില്ലാകേന്ദ്രങ്ങളിലും സപ്ലൈകോ ഓണം ഫെയറുകൾ പ്രവർത്തിക്കും. സംസ്ഥാനതല ഉദ്‌ഘാടനം ഈ മാസം 29ന്‌ തിരുവനന്തപുരത്ത്‌ മുഖ്യമന്ത്രി പിണറായി വിജയൻ നിർവഹിക്കും. ജില്ലാ ആസ്ഥാനങ്ങളിൽ സെപ്തംബർ രണ്ടുമുതൽ 10 വരെയാണ് ഫെയർ. എല്ലാ നിയോജകമണ്ഡലത്തിലും ഒരു ഓണം ഫെയർ ഉണ്ടാവും.

താലൂക്ക് കേന്ദ്രങ്ങളിൽ പ്രത്യേകമായോ സപ്ലൈകോ വിൽപ്പനശാലയോട് ചേർന്നോ മേള ഉണ്ടാവും. ജില്ലാ/താലൂക്കുതല ഫെയറിൽ പച്ചക്കറികളും ലഭിക്കും. സപ്ലൈകോ വില്പനശാല ഇല്ലാത്ത 21 പഞ്ചായത്തുകളിൽ സ്പെഷ്യൽ മിനി ഫെയറും ഒറ്റപ്പെട്ട ആദിവാസി മേഖലകളിൽ മൊബൈൽ മാവേലി വിപണിയും എത്തും.