ഇന്ത്യയുമായി ഉടൻ തന്നെ വലിയ യുദ്ധത്തിന് സാധ്യതയുണ്ടെന്ന് പാകിസ്താൻ മന്ത്രി

ഇന്ത്യയുമായി ഉടൻ തന്നെ യുദ്ധത്തിന് സാധ്യതയുണ്ടെന്ന് പാകിസ്താൻ റെയിൽവേ മന്ത്രി ഷെയ്ക് റഷീദ് അഹമ്മദ്. വരുന്ന ഒക്ടോബറിലോ അതു കഴിഞ്ഞു വരുന്ന മാസങ്ങളിലോ ഇന്ത്യയുമായി വലിയ യുദ്ധമുണ്ടാകുമെന്ന് റഷീദ് അഹമ്മദ് പ്രസ്താവന നടത്തിയതായി പാക് മാധ്യമങ്ങളെ ഉദ്ദരിച്ച്  ദേശീയ വാർത്താ ഏജൻസികൾ റിപ്പോർട്ട് ചെയ്തിട്ടുണ്ട്.

കശ്മീരിന്റെ പ്രത്യേക പദവി റദ്ദാക്കിയതിന് പിന്നാലെ ഇന്ത്യക്കെതിരെ പാകിസ്താൻ നടത്തുന്ന പ്രകോപനങ്ങളുടെ തുടർച്ചയായാണ്  ഇപ്പോൾ യുദ്ധ ഭീഷണിയുമായി പാക് മന്ത്രി രംഗത്തെത്തിയിരിക്കുന്നത്. അതേ സമയം കറാച്ചിക്ക് സമീപം മിസൈൽപരീക്ഷണം നടത്തുന്നതിന് മുന്നോടിയായി പാകിസ്താൻ നോട്ടാം മുന്നറിയിപ്പ് നൽകിയതായും ദേശീയ വാർത്താ ഏജൻസികൾ റിപ്പോർട്ട് ചെയ്തിട്ടുണ്ട്.