തെരഞ്ഞെടുപ്പ് പത്രികയിൽ ആദിത്യ താക്കറെയുടെ ബിഎംഡബ്ലിയു കാറിന് ആറ് ലക്ഷം രൂപ

താക്കറെ കുടുംബത്തിൽ നിന്ന് ആദ്യമായി തെരഞ്ഞെടുപ്പിൽ മത്സരിക്കുന്ന ശിവസേനയുടെ യുവ നേതാവാണ് ആദിത്യ താക്കറെ. വർളി നിയമ സഭാ മണ്ഡലത്തിൽ നിന്ന് മത്സരിക്കുന്ന ആദിത്യ താക്കറെ  ഇന്നലെ മണ്ഡലത്തിലെത്തി നാമനിർദേശ പത്രിക സമർപ്പിച്ചു.

പത്രികയ്‌ക്കൊപ്പം സമർപ്പിച്ച സത്യവാങ്മൂലത്തിൽ 16 കോടി സ്വത്തുക്കളുടെ വിവരങ്ങളാണ് വെളിപ്പെടുത്തിയിട്ടുള്ളത്. ഇതിൽ ഒരു ബിഎംഡബ്ലിയു കാറിന്റെ വില ആറരലക്ഷം രൂപയായാണ് കാണിച്ചിട്ടുള്ളത്. തൊഴിൽ ബിസിനസ് എന്നും, വാർഷിക വരുമാനം 26.3 ലക്ഷം രൂപയുമാണ് രേഖപ്പെടുത്തിയിട്ടുള്ളത്.

ശിവസേന അദ്ധ്യക്ഷൻ ഉദ്ധവ് താക്കറെയുടെ മകനാണ് 29 കാരനായ ആദിത്യതാക്കറെ. പിതാവിനും മാതാവ് രശ്മിക്കും സഹോദരൻ തേജസിനുമൊപ്പം റോഡ് ഷോ നടത്തിയാണ് ആദിത്യ നാമനിർദേശ പത്രിക സമർപ്പിക്കാനെത്തിയത്.