ജെഎൻയു വിദ്യാർത്ഥി സമരം വിജയം; ഹോസ്റ്റൽ ഫീസ് വർധന പിൻവലിച്ചു

ജവഹർലാൽ നെഹ്‌റു യൂണിവേഴ്‌സിറ്റിലെ വിദ്യാർത്ഥി സമരം വിജയം. സർവകലാശാലയിൽ നടപ്പിലാക്കിയ ഹോസ്റ്റൽ ഫീസ് വർധന പിൻവലിച്ചു. എക്‌സിക്യൂട്ടീവ് കമ്മിറ്റിയിലാണ് തീരുമാനം. സാമ്പത്തികമായി പിന്നോക്കം നിൽക്കുന്ന വിദ്യാർത്ഥികൾക്കായി പ്രത്യേകം പദ്ധതി നടപ്പിലാക്കാനും തീരുമാനമായി.

Read also: വിദ്യാർത്ഥികളുമായി വൈസ് ചാൻസലർ സംസാരിക്കും; ജെഎൻയു സമരം ഇന്ന് രാത്രിയോടെ ഒത്തുതീർപ്പാക്കുമെന്ന് കേന്ദ്രമന്ത്രി

ഹോസ്റ്റൽ ഫീസ് അഞ്ച് ഇരട്ടിയോളം വർദ്ധിപ്പിച്ചതിനെതിരെ 15 ദിവസത്തിലധികമായി ക്യാമ്പസിൽ വിദ്യാർത്ഥികൾ പ്രതിഷേധത്തിലായിരുന്നു. ഞായറാഴ്ച വിദ്യാർത്ഥികൾ സമരം ശക്തമാക്കി. ഉപരാഷ്ട്രപതി വെങ്കയ്യ നായിഡു ഉൾപ്പടെ പങ്കെടുക്കുന്ന ബിരുദ ദാനചടങ്ങ് ബഹിഷ്‌കരിച്ച വിദ്യാർത്ഥികൾ കാമ്പസിൽ പ്രകടനം നടത്തി. പ്രതിഷേധിച്ച വിദ്യാർത്ഥികൾക്ക് നേരെ പൊലീസ് ലാത്തിച്ചാർജ് നടത്തുകയും ജലപീരങ്കി പ്രയോഗിക്കുകയും ചെയ്തിരുന്നു. വിദ്യാർത്ഥികളുടെ ആവശ്യങ്ങൾ അംഗീകരിക്കാമെന്ന് കേന്ദ്ര മാനവ വിഭവ ശേഷി മന്ത്രി പറഞ്ഞെങ്കിലും അംഗീകരിക്കാൻ വിദ്യാർത്ഥികൾ തയ്യാറായില്ല. വൈസ് ചാൻസലറെ കാണാതെ സമരത്തിൽ നിന്ന് പിന്മാറില്ലെന്ന നിലപാടിലായിരുന്നു വിദ്യാർത്ഥികൾ.