ശബരിമല യുവതീപ്രവേശ വിധി അതേപടി നിലനിൽക്കുന്നു; കോടതി വിധി കളിക്കാനുള്ളതല്ല: ജസ്റ്റിസ് ആർ എഫ് നരിമാൻ

ശബരിമല യുവതീപ്രവേശ വിധി അതേപടി നിലനിൽക്കുന്നുവെന്ന് ജസ്റ്റിസ് ആർ എഫ് നരിമാൻ. സുപ്രിംകോടതി വിധി കളിക്കാനുള്ളതല്ല. പുനഃപരിശോധനാ ഹർജികളിലെ ഭിന്നവിധി വായിച്ചു നോക്കാനും സോളിസിറ്റർ ജനറൽ തുഷാർ മേത്തയോട് നരിമാൻ ആവശ്യപ്പെട്ടു.

കർണാടക കോൺഗ്രസ് നേതാവ് ഡി.കെ. ശിവകുമാറിന് കീഴ്‌കോടതി നൽകിയ ജാമ്യം റദ്ദാക്കണമെന്ന എൻഫോഴ്‌സ്‌മെന്റ് ഡയറക്ടറേറ്റിന്റെ ഹർജി പരിഗണിക്കവെയാണ് ജസ്റ്റിസ് ആർ.എഫ്.നരിമാൻ അപ്രതീക്ഷിതമായി ശബരിമല വിധി പരാമർശിച്ചത്. എൻഫോഴ്‌സ്‌മെന്റിന് വേണ്ടി ഹാജരായ സോളിസിറ്റർ ജനറൽ തുഷാർ മേത്തയോടായിരുന്നു ഉപദേശവും നിർദേശവും.

Read Also : ശബരിമലയിലെത്തുന്ന യുവതികൾക്ക് സംരക്ഷണം നൽകില്ലെന്ന് സർക്കാർ

നരിമാന്റെ വാക്കുകൾ ഇങ്ങനെ: ദയവായി പുനഃപരിശോധനാ ഹർജികളിലെ ഭിന്നവിധി വായിച്ചു നോക്കുക. ഞങ്ങളുടെ വിധിന്യായങ്ങൾ കളിക്കാനുള്ളതല്ല. വിധി ഇപ്പോഴും നിലനിൽക്കുന്നുണ്ടെന്ന് നിങ്ങളുടെ സർക്കാരിനോട് പറയുക. നരിമാന്റെ നിർദേശത്തോട് സോളിസിറ്റർ ജനറൽ കോടതിയിൽ പ്രതികരിച്ചില്ല. യുവതീ പ്രവേശ വിധി നടപ്പാക്കുക തന്നെ വേണമെന്ന് ഇന്നലത്തെ ഭിന്നവിധിയിൽ ആർ.എഫ്. നരിമാൻ വ്യക്തമാക്കിയിരുന്നു. വിധിക്കെതിരെ സംഘടിത പ്രതിഷേധമുണ്ടായതിനെയും വിമർശിച്ചിരുന്നു.

sabarimala, supreme court, sabarimala women entry