‘സ്ഥാനമൊഴിഞ്ഞ് ബിജെപി അധ്യക്ഷനാകുന്നതാകും ഉചിതം’: ഗവർണർക്കെതിരെ ടി എൻ പ്രതാപൻ

ഗവർണർ ആരിഫ് മുഹമ്മദ് ഖാനെതിരെ ടി എൻ പ്രതാപൻ എംപി. ഗവർണർ കൂറ് പുലർത്തേണ്ടത് ഭരണഘടനയോടാണെന്ന് ടി എൻ പ്രതാപൻ പറഞ്ഞു. ഗവർണർ സ്ഥാനം രാജിവച്ച് ആരിഫ് മുഹമ്മദ് ഖാൻ ബിജെപി അധ്യക്ഷനാകുന്നതാകും ഉചിതമെന്നും അദ്ദേഹം പരിഹസിച്ചു.

ഭരണഘടനപദവിയിൽ ഇരിക്കുന്ന ആൾ വിശ്വാസവും മര്യാദയും ലംഘിക്കരുത്. കരസേന മേധാവി രാഷ്ട്രീയം പറഞ്ഞ് നിയമം ലംഘിച്ചിട്ടുണ്ട്. ഇക്കാര്യത്തിൽ നടപടിക്കായി രാഷ്ട്രപതിക്ക് കത്ത് നൽകിയിട്ടുണ്ടെന്നും പ്രതാപൻ പറഞ്ഞു.

അതിനിടെ ഗവർണറെ പരിഹസിച്ച് ചരിത്രകാരൻ ഇർഫാൻ ഹബീബും രംഗത്തെത്തിയിരുന്നു. ഗവർണർ തന്നേക്കാൾ വലിയ ചരിത്രകാരനായിരിക്കാമെന്നും, എന്നാൽ അദ്ദേഹത്തിന്റെ ഒരു പുസ്തകം പോലും താൻ കണ്ടിട്ടില്ലെന്നും ഇർഫാൻ ഹബീബ് പറഞ്ഞു.