രഞ്ജി ട്രോഫി: കേരളത്തിന് ലീഡ് 154 റൺസ്; ഹൈദരാബാദ് ജയത്തിലേക്ക്

കേരളത്തിനെതിരായ രഞ്ജി ട്രോഫി മത്സരത്തിൽ ഹൈദരാബാദ് ജയത്തിലേക്ക്. കേരളം മുന്നോട്ടു വെച്ച 155 റൺസ് വിജയലക്ഷ്യത്തിലേക്ക് അനായാസം ബാറ്റു വീശുന്ന ഹൈദരാബാദ് വിക്കറ്റ് നഷ്ടമില്ലാതെ 31 റൺസിലെത്തിയിട്ടുണ്ട്. ഇന്ന് ഒരു ദിവസം കൂടി കളി ശേഷിക്കെ മത്സരം ഹൈദരാബാദ് അനായാസം ജയിക്കാനാണ് സാധ്യത.

ആദ്യ ഇന്നിംഗ്സിൽ 64 റൺസ് ലീഡ് വഴങ്ങി രണ്ടാം ഇന്നിംഗ്സിൽ ബാറ്റിംഗിനിറങ്ങിയ കേരളം 218 റൺസെടുത്ത് പുറത്തായിരുന്നു. രോഹൻ പ്രേമും വിഷ്ണു വിനോദും 44 റൺസ് വീതം നേടി കേരളത്തിൻ്റെ ടോപ്പ് സ്കോററായി. സൽമാൻ നിസാർ, അക്ഷയ് ചന്ദ്രൻ എന്നിവർ 30 റൺസ് വീതം നേടി. 22 റൺസ് വീതമെടുത്ത ജലജ് സക്സേനയും സച്ചിൻ ബേബിയും കേരള ഇന്നിംഗ്സിലേക്ക് ശ്രദ്ധേയ സംഭാവന നൽകി. ഹൈദരാബാദിനു വേണ്ടി മുഹമ്മദ് സിറാജ് മൂന്നു വിക്കറ്റ് വീഴ്ത്തി. മെഹദി ഹസൻ, സാകേത്, രവി കിരൺ എന്നിവർ രണ്ട് വിക്കറ്റ് വീതം വീഴ്ത്തി.

രണ്ടാം ഇന്നിംഗ്സിൽ അനായാസം ബാറ്റ് ചെയ്യുന്ന ഹൈദരാബാദിനായി 19 റൺസുമായി ക്യാപ്റ്റൻ തന്മയ് അഗർവാളും 12 റൺസെടുത്ത് അൽഷത് റെഡ്ഡിയും പുറത്താവാതെ നിൽക്കുന്നു. 124 റൺസ് കൂടിയാണ് ഹൈദരാബാദിന് ജയിക്കാൻ വേണ്ടത്.

ഈ മത്സരം കൂടി പരാജയപ്പെട്ടാൽ കേരളത്തിൻ്റെ മുന്നോട്ടുള്ള യാത്ര ദുർഘടമാവും. മൂന്ന് മത്സരങ്ങളിൽ നിന്ന് ഒരു സമനിലയും രണ്ട് തോൽവിയുമായി മൂന്നു പോയിൻ്റാണ് കേരളത്തിൻ്റെ ആകെ സമ്പാദ്യം.

Story Highlights: Ranji Trophy, Kerala