ഉംറ കഴിഞ്ഞു മടങ്ങിയ മലയാളി കുടുംബം സഞ്ചരിച്ച വാഹനം അപകടത്തിൽപെട്ട് രണ്ട് പേർ മരിച്ചു

സൗദിയിൽ ഉംറ കഴിഞ്ഞു മടങ്ങിയ മലയാളി കുടുംബം സഞ്ചരിച്ച വാഹനം റിയാദിൽ അപകടത്തിൽപെട്ട് രണ്ടു പേർ മരിച്ചു. മാഹി സ്വദേശി ഷമീം മുസ്തഫ (40), സുഹൃത്തായ അമീനിന്റെ മകൻ അർഹാം (നാല്) എന്നിവരാണ് മരിച്ചത്. ഷമീമിന്റെ ഭാര്യ അഷ്മില, അമീനിന്റെ ഭാര്യ ഷാനിബ എന്നിവർക്ക് പരുക്കേറ്റു. ഷമീമിന്റെ മക്കളായ അയാൻ, സാറ എന്നിവർ നിസാര പരിക്കുകളോടെ രക്ഷപ്പെട്ടു.

റിയാദ് ജിദ്ദാ ഹൈവേയിൽ റിയാദിൽ നിന്ന് 300 കിലോമീറ്റർ അകലെ ഹുമയാത്ത് പൊലീസ് സ്റ്റേഷൻ പരിധിയിൽ ഇന്ന് പുലർച്ചെ രണ്ടിനാണ് അപകടം. മൃതദേഹങ്ങൾ ഹുമയാത്തിന് സമീപം അൽഖസ്റ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. നിസാര പരിക്കേറ്റ അയാൻ, സാറ എന്നീ കുട്ടികൾ അൽഖസ്റ ആശുപത്രിയിൽ ചികിത്സയിലാണ്.