ചൈനീസ് പ്രസിഡന്റ് ഷീ ജിന്‍പിങ് ഹുവാന്‍ നഗരം സന്ദര്‍ശിച്ചു

കൊവിഡ് 19 ന്റെ പ്രഭവകേന്ദ്രമായ ഹുവാന്‍ നഗരം ചൈനീസ് പ്രസിഡന്റ് ഷീ ജിന്‍പിങ് സന്ദര്‍ശിച്ചു. ചൈനയിലെ സ്ഥിതിഗതികള്‍ നിയന്ത്രണവിധേയമാണെന്ന സന്ദേശം നല്‍കുന്നതിന്റെ ഭാഗമായാണ് നടപടി.
കൊവിഡ് 19 വൈറസ് ബാധ സ്ഥിരീകരിച്ചത്തിന് ശേഷം ഇതാദ്യമായാണ് ചൈനീസ് പ്രസിഡന്റ് വുഹാന്‍ സന്ദര്‍ശിക്കുന്നത്. ഐസലേഷനില്‍ കഴിയുന്ന വുഹാന്‍ നിവാസികളുമായി നേരിട്ട് സംവദിച്ച പ്രസിഡന്റ് കൊറോണയെ നേരിടാന്‍ 10 ദിവസം കൊണ്ട് പണികഴിപ്പിച്ച ഹുവോഷെന്‍ ആശുപത്രിയും സന്ദര്‍ശിച്ചു. ആശുപത്രിയിലെ സൗകര്യങ്ങള്‍ വിലയിരുത്തിയ അദ്ദേഹം ഡോക്ടര്‍മാരുമായി കൂടിക്കാഴ്ച്ചയും നടത്തി.

ചൈനയില്‍ വൈറസ് പടരുന്നതില്‍ ഗണ്യമായി കുറവുണ്ടായ സാഹചര്യത്തിലാണ് ഷീ ജിന്‍പിങ് വുഹാന്‍ സന്ദര്‍ശനമെന്നത് ശ്രദ്ധേയമാണ്. ഇന്ന് 19 പുതിയ കേസുകള്‍ മാത്രമാണ് രാജ്യത്ത് റിപ്പോര്‍ട്ട് ചെയ്തത്. ചൈനയിലെ വൈറസ് ബാധ ഏറെകുറെ നിയന്ത്രണവിധേയമാണെന്ന ആത്മവിശ്വാസം രാജ്യത്തെ ജനങ്ങള്‍ക്കൊപ്പം അന്താരാഷ്ട്ര സമൂഹത്തിന് കൂടി നല്‍കുക, എന്നതാണ് പ്രസിഡന്റിന്റെ വുഹാന്‍ സന്ദര്‍ശനത്തിലൂടെ ചൈനീസ് ഭരണകൂടം ലക്ഷ്യമിടുന്നത്. ഇതുവരെ 80,754 പേര്‍ക്കാണ് ചൈനയില്‍ വൈറസ് ബാധ സ്ഥിരീകരിച്ചത്. ഇവരില്‍ 3,136 പേര്‍ മരണത്തിന് കീഴടങ്ങി.

Story Highlights- Chinese President Xi Jinping, visited Huan City, coronavirus