കൊവിഡ് 19 : സുപ്രിംകോടതിയിലും നിയന്ത്രണം; പരിഗണിക്കുക അടിയന്തര കേസുകൾ മാത്രം

കൊവിഡ് 19ന്റെ സാഹചര്യത്തിൽ കർശന നിയന്ത്രണവുമായി സുപ്രിംകോടതി. അടിയന്തര സ്വഭാവമുള്ള കേസുകൾ മാത്രമേ പരിഗണിക്കുകയുള്ളുവെന്ന് സുപ്രിംകോടതി സെക്രട്ടറി ജനറൽ വിജ്ഞാപനമിറക്കി.

ശബരിമല കേസ് അടക്കം പരിഗണിക്കുന്ന ഭരണഘടനാ ബെഞ്ചുകളുടെ സിറ്റിംഗ് ഉണ്ടാകില്ലെന്നാണ് സൂചന. അടുത്ത തിങ്കളാഴ്ച മുതൽ ശബരിമല ബെഞ്ച് സിറ്റിംഗ് പുനരാരംഭിക്കാനായിരുന്നു തീരുമാനം. അഭിഭാഷകർക്ക് മാത്രമായിരിക്കും കോടതികളിലേക്ക് പ്രവേശനം. അത്യാവശ്യ ഘട്ടങ്ങളിൽ ഒരു കക്ഷിയെ കൂടി അഭിഭാഷകനൊപ്പം അനുവദിക്കും. മാധ്യമപ്രവർത്തകർക്കും പ്രവേശനവിലക്കേർപ്പെടുത്തി. ആരോഗ്യ വിദഗ്ധരുടെയും മാധ്യമപ്രവർത്തകരുടെയും അടക്കം അഭിപ്രായം പരിഗണിച്ചാണ് നടപടിയെന്നും സുപ്രിംകോടതി വ്യക്തമാക്കി.

അതേ സമയം, രാജ്യത്ത് 81 പേരിൽ കൊറോണ സ്ഥിരീകരിച്ചിട്ടുണ്ട്. കൊറോണ ബാധിച്ച് ഇന്നലെ ഇന്ത്യയിൽ ഒരാൾ മരിച്ചു. കർണാടക സ്വദേശിയാണ് മരിച്ചത്.

Story Highlights- Corona Virus