ആന്ധ്രാപ്രദേശ് ഉപമുഖ്യമന്ത്രിയുടെ സഹായിക്ക് കൊവിഡ്

ആന്ധ്രാപ്രദേശ് ഉപമുഖ്യമന്ത്രി എകെകെ ശ്രീനിവാസിന്റെ സഹായിക്ക് കൊവിഡ് സ്ഥിരീകരിച്ചു. ഉപമുഖ്യമന്ത്രിയുൾപ്പെടെ സംസ്ഥാന സെക്രട്ടറിയേറ്റിലെ 13 പേരും കൊവിഡ് പരിശോധനയ്ക്ക് വിധേയരായി. ഇവരുടെ പരിശോധനാ ഫലം നെ​ഗറ്റീവാണ്. ഉപമുഖ്യമന്ത്രി വാർത്താസമ്മേളനത്തിൽ അറിയിച്ചതാണ് ഇക്കാര്യം.

ഉപമുഖ്യമന്ത്രിയുടെ സഹായിക്ക് ട്രൂനാറ്റ് പരിശോധനയാണ് നടത്തിയത്. ആർടി-പിസിആർ പരിശോധനയ്ക്കായി കൂടുതൽ സാമ്പിളുകൾ അയച്ചിട്ടുണ്ട്. സംസ്ഥാനത്ത് ലക്ഷണങ്ങളില്ലാത്ത കേസുകൾ വർദ്ധിച്ചുവരികയാണെന്ന് ഉപമുഖ്യമന്ത്രി അറിയിച്ചു.

ആന്ധ്രാപ്രദേശിൽ 1332 പേർക്കാണ് ഇതുവരെ കൊവിഡ് ബാധിച്ചത്. നൂറിലേറെ കേസുകൾ റിപ്പോർട്ട് ചെയ്ത കർനൂൾ, ഗുണ്ടൂർ, കൃഷ്ണ ജില്ലകളിലാണ് പ്രതിരോധ പ്രവർത്തനങ്ങളിൽ പ്രത്യേക ശ്രദ്ധ കേന്ദ്രീകരിച്ചിരിക്കുന്നത്.