കരാട്ടെയുടെ കരുത്തുമായി തെരഞ്ഞെടുപ്പിന്റെ അങ്കത്തട്ടിലേക്ക് റീനു

ഇടുക്കി ജില്ല പഞ്ചായത്തിലേക്ക് മത്സരിക്കുന്ന റീനു ജെഫിന്‍ ബ്ലാക്ക് ബെല്‍റ്റുള്ള സ്ഥാനാര്‍ഥിയാണ്. തെരഞ്ഞെടുപ്പ് അങ്കത്തട്ടില്‍ ആദ്യമാണെങ്കിലും കരാട്ടെ അഭ്യസിച്ചതിലൂടെ ലഭിച്ച ആത്മവിശ്വാസമാണ് ഈ സ്ഥാനാര്‍ത്ഥിയുടെ മുതല്‍ക്കൂട്ട്. കരാട്ടെയില്‍ ബ്ലാക്ക് ബെല്‍റ്റ് നേടി കഴിവ് തെളിയിച്ചിട്ടുണ്ട് റീനു. എന്നാല്‍ തെരഞ്ഞെടുപ്പില്‍ റീനുവിന് ഇത് ആദ്യ അങ്കമാണ്. കരിമണ്ണൂര്‍ ഡിവിഷനിലെ ഇടുക്കി ജില്ലാ പഞ്ചായത്തിലേക്ക് മത്സരിക്കുന്ന ഇടതുപക്ഷ സ്ഥാനാര്‍ത്ഥിയാണ് ഈ കരാട്ടെക്കാരി.

പ്രചാരണത്തില്‍ കരാട്ടെക്കാരി എന്ന ലേബല്‍ ഗുണം ചെയുന്നുണ്ടെന്നാണ് സ്ഥാനാര്‍ത്ഥിയുടെ വിശ്വാസം. അതേസമയം റീനുവിന്റെ തെരഞ്ഞെടുപ്പ് പഞ്ചുകള്‍ ബ്ലോക്ക് ചെയ്യാന്‍ എതിരാളികളും പൂര്‍ണ സജ്ജമാണ്. എന്നാല്‍ രണ്ടില കൂടി ലഭിച്ചതോടെ സ്ഥാനാര്‍ത്ഥി പൂര്‍ണ ആത്മവിശ്വാസത്തിലാണ്.

Story Highlights – local body election