അവസാന മൂന്ന് സീസണുകളിൽ 4 പരിശീലകരും 7 ജയവും; ബ്ലാസ്റ്റേഴ്സിന്റെ മോശം റെക്കോർഡ് ഇങ്ങനെ

കേരള ബ്ലാസ്റ്റേഴ്സ് ഇക്കുറിയും പരുങ്ങലിലാണ്. ലീഗിലെ അവസാന സ്ഥാനക്കാരോടും പരാജയപ്പെട്ട് ഒരുപക്ഷേ, ചരിത്രത്തിലെ തന്നെ ഏറ്റവും മോശം പ്രകടനത്തിലേക്കാണ് ബ്ലാസ്റ്റേഴ്സിൻ്റെ യാത്ര. കഴിഞ്ഞ ഏതാനും സീസണുകളായി കാണുന്ന പ്രകടനം അങ്ങനെ തന്നെ ഈ സീസണിലും ആവർത്തിക്കുകയാണ്. ഇതിനിടെ ഞെട്ടിപ്പിക്കുന്ന മറ്റൊരു കണക്ക് കൂടി സമൂഹമാധ്യമങ്ങൾ ചൂണ്ടിക്കാട്ടുന്നുണ്ട്. അവസാനം ബ്ലാസ്റ്റേഴ്സ് കളിച്ച അവസാനത്തെ മൂന്ന് സീസണുകളിൽ നാല് പരിശീലകരും 7 ജയവുമാണ് ബ്ലാസ്റ്റേഴ്സിൻ്റെ സമ്പാദ്യം.

Read Also : ഇന്ന് ബ്ലാസ്റ്റേഴ്സ് ഒഡീഷക്കെതിരെ; അവസാന സ്ഥാനക്കാർ തമ്മിൽ പോര്

2018-19 സീസണിൽ ഡേവിഡ് ജെയിംസ്, നെലോ വിംഗാഡ എന്നിവർ ബ്ലാസ്റ്റേഴ്സിനെ പരിശീലിപ്പിച്ചു. സീസണിൽ ആകെ 2 കളിയാണ് ബ്ലാസ്റ്റേഴ്സ് ജയിച്ചത്. ആകെ 18 കളികൾ സീസണിൽ കളിച്ചു. അടുത്ത സീസണിൽ ഈൽകോ ഷറ്റോരി എത്തി. 18 മത്സരങ്ങളിൽ നിന്ന് 4 ജയം. ഫലങ്ങൾക്കപ്പുറം ബ്ലാസ്റ്റേഴ്സ് ഭേദപ്പെട്ട ഫുട്ബോൾ കളിച്ച സീസൺ. മറ്റ് സീസണുകൾക്ക് വ്യത്യസ്തമായി സ്കോർഷീറ്റിൽ ഗോളുകൾ പിറന്ന സീസൺ. പക്ഷേ, ഈ സീസണിൽ വീണ്ടും പരിശീലകൻ മാറി. കിബു വിക്കൂനെയ്ക്ക് കീഴിൽ ഇതുവരെ ഏഴ് മത്സരങ്ങളിൽ നിന്ന് ഒരു ജയം. ആകെ അവസാന മൂന്ന് സീസണിൽ 7 ജയം മാത്രം.

അവസാന മൂന്ന് സീസണുകളിൽ ബ്ലാസ്റ്റേഴ്സ് 19 മത്സരങ്ങളിൽ പരാജയപ്പെട്ടപ്പോൾ അത്ര തന്നെ കളികൾ സമനിലയായി. ആകെ നേടിയത് 40 പോയിൻ്റ്. 57 ഗോളുകൾ സ്കോർ ചെയ്തപ്പോൾ 77 എണ്ണം വഴങ്ങി.