സിപിഐ മന്ത്രിമാർ പുതുമുഖങ്ങൾ; പ്രൈവറ്റ് സെക്രട്ടറിമാർ പരിചയ സമ്പന്നർ

സിപിഐയുടെ 4 മന്ത്രിമാർക്കും പ്രൈവറ്റ് സെക്രട്ടറിമാ‍ർ സർക്കാർ സർവീസിലുള്ള മുതിർന്ന ഉദ്യോഗസ്ഥർ. മന്ത്രിമാർ പുതുമുഖങ്ങൾ ആയതിനാലാണു പ്രൈവറ്റ് സെക്രട്ടറിമാരായി പരിചയ സമ്പന്നരായ ഉദ്യോഗസ്ഥരെ നിയമിച്ചത്.

നേരത്തെ മന്ത്രിമാരുടെ പഴ്‌സനൽ സ്റ്റാഫ് അംഗങ്ങളായി പ്രവർത്തിച്ചവരാണ് പലരും. റവന്യു മന്ത്രി കെ.രാജന്റെ പ്രൈവറ്റ് സെക്രട്ടറിയായി സെക്രട്ടേറിയറ്റ് പൊതുഭരണ വിഭാഗത്തിലെ സ്‌പെഷൽ സെക്രട്ടറി പദവിയിലുള്ള പി.വി.മനോജിനെ നിയമിച്ചു. മുൻ കൃഷി മന്ത്രി വി.എസ്.സുനിൽകുമാറിന്റെ പ്രൈവറ്റ് സെക്രട്ടറിയായിരുന്നു മനോജ്.

കൃഷിമന്ത്രി പി.പ്രസാദിന്റെ പ്രൈവറ്റ് സെക്രട്ടറിയായി കേരള ഗസറ്റഡ് ഓഫിസേഴ്‌സ് ഫെഡറേഷൻ സംസ്ഥാന ഭാരവാഹിയും ജലവിഭവ വകുപ്പിലെ എക്‌സിക്യൂട്ടിവ് എൻജിനീയറുമായ വിനോദ് മോഹനെ നിയമിച്ചു.

ഭക്ഷ്യ മന്ത്രി ജി.ആർ.അനിലിന്റെ പ്രൈവറ്റ് സെക്രട്ടറിയായി നിയമ വകുപ്പിലെ ഡപ്യൂട്ടി സെക്രട്ടറി പി.പ്രദീപ്കുമാറിനെ നിയമിച്ചു. മൃഗസംരക്ഷണ മന്ത്രി ജെ.ചിഞ്ചുറാണിയുടെ പ്രൈവറ്റ് സെക്രട്ടറിയായി അനിൽ ഗോപിനാഥിനെയാണു നിയമിച്ചത്. ഇദ്ദേഹം മുൻ മന്ത്രി പി.തിലോത്തമന്റെ അഡീഷനൽ പ്രൈവറ്റ് സെക്രട്ടറിയായിരുന്നു.