ടി-20യിൽ 14,000 റൺസ് നേടുന്ന ആദ്യത്തെ കളിക്കാരൻ; ചരിത്ര നേട്ടവുമായി ക്രിസ് ഗെയിൽ
ടി-20യിൽ 14,000 റൺസ് തികയ്ക്കുന്ന ആദ്യ താരമെന്ന നേട്ടം സ്വന്തമാക്കി വെസ്റ്റ് ഇൻഡീസ് സൂപ്പർ താരം ക്രിസ് ഗെയിൽ. ഓസ്ട്രേലിയക്കെതിരായ മൂന്നാം ടി-20 മത്സരത്തിനിടെയാണ് ഗെയിൽ ഈ റെക്കോർഡ് കുറിച്ചത്. വിൻഡീസ് ഇന്നിംഗ്സിൻ്റെ 9ആം ഓവറിൽ ഓസീസ് സ്പിന്നർ ആദം സാംപയെ ബൗണ്ടറി ലൈനു പുറത്തെത്തിച്ചായിരുന്നു ഗെയിലിൻ്റെ റെക്കോർഡ് നേട്ടം. മത്സരത്തിൽ ഗെയിൽ 38 പന്തുകളിൽ നിന്ന് 67 റൺസെടുത്തു.
ദേശീയ ടീമിൽ ഗെയിലിൻ്റെ സഹതാരമായ കീറോൺ പൊള്ളാർഡ് ആണ് ടി-20 റൺസുകളിൽ രണ്ടാം സ്ഥാനത്ത്. 10836 റൺസാണ് പൊള്ളാർഡിനുള്ളത്. പാക് താരം ഷൊഐബ് മാലിക്ക് 10074 റൺസുമായി മൂന്നാം സ്ഥാനത്തുണ്ട്. ഡേവിഡ് വാർണർ (10017), വിരാട് കോലി (9992) എന്നിവരാണ് യഥാക്രമം നാല്, അഞ്ച് സ്ഥാനങ്ങളിൽ ഉള്ളത്.
മത്സരത്തിൽ വെസ്റ്റ് ഇൻഡീസ് 6 വിക്കറ്റിനു വിജയിച്ചിരുന്നു. ഇതോടെ അഞ്ച് മത്സരങ്ങൾ അടങ്ങിയ പരമ്പര വെസ്റ്റ് ഇൻഡീസ് 3-0ന് സ്വന്തമാക്കി. ടോസ് നേടി ആദ്യം ബാറ്റ് ചെയ്ത ഓസ്ട്രേളിയക്ക് നിശ്ചിത 20 ഓവറിൽ 6 വിക്കറ്റ് നഷ്ടത്തിൽ 141 റൺസ് മാത്രമേ നേടാനായുള്ളൂ. മറുപടി ബാറ്റിംഗിനിറങ്ങിയ വിൻഡീസ് 4 വിക്കറ്റ് മാത്രം നഷ്ടപ്പെടുത്തി 14.5 ഓവറിൽ വിജയിക്കുകയായിരുന്നു.
Story Highlights: chris gayle sets another t20 record
ട്വന്റിഫോർ ന്യൂസ്.കോം വാർത്തകൾ ഇപ്പോൾ വാട്സാപ്പ് വഴിയും ലഭ്യമാണ് Click Here