സ്റ്റുവർട്ട് ബ്രോഡ് ഇന്ത്യക്കെതിരായ പരമ്പരയിൽ നിന്ന് പുറത്ത്

ഇംഗ്ലണ്ട് പേസർ സ്റ്റുവർട്ട് ബ്രോഡ് ഇന്ത്യക്കെതിരായ പരമ്പരയിൽ നിന്ന് പുറത്ത്. പരിശീലനത്തിനിടെ കാൽവെണ്ണയ്ക്ക് പരുക്കേറ്റതിനെ തുടർന്നാണ് ടീമിലെ മുതിർന്ന അംഗങ്ങളിൽ ഒരാളായ താരം പരമ്പരയിൽ നിന്ന് തന്നെ പുറത്തായത്. ആദ്യ മത്സരത്തിൽ താരം ഒരു വിക്കറ്റ് വീഴ്ത്തിയിരുന്നു. ബ്രോഡിനു പകരക്കാരനായി സാഖിബ് മഹ്മൂദിനെ ടീമിൽ ഉൾപ്പെടുത്തിയിട്ടുണ്ട്. നാളെയാണ് ഇംഗ്ലണ്ട്-ഇന്ത്യ ടെസ്റ്റ് പരമ്പരയിലെ രണ്ടാം മത്സരം. (stuart broad test india)

അതേസമയം, പരുക്കേറ്റ ജെയിംസ് ആൻഡേഴ്സൺ നാളെ ആരംഭിക്കുന്ന മത്സരത്തിൽ കളിക്കുന്ന കാര്യവും സംശയത്തിലാണ്. ആൻഡേഴ്സണും നാളെ കളത്തിലിറങ്ങിയില്ലെങ്കിൽ 2007നു ശേഷം ആൻഡേഴ്സണും ബ്രോഡും ഇല്ലാതെ ഇംഗ്ലണ്ട് സ്വന്തം നാട്ടിൽ കളിക്കുന്ന രണ്ടാം ടെസ്റ്റ് മത്സരമാവും ഇത്.

Read Also: ശർദ്ദുൽ താക്കൂറിനു പരുക്ക്; രണ്ടാം ടെസ്റ്റിൽ അശ്വിനു സാധ്യത

ഇന്ത്യൻ നിരയിൽ ഓൾറൗണ്ടർ ശർദ്ദുൽ താക്കൂറിനു പരുക്കാണ്. തുടഞരമ്പിനാണ് പരുക്കേറ്റിരിക്കുന്നത്. താക്കൂറിനു പകരം സ്പിൻ ഓൾറൗണ്ടർ ആർ അശ്വിൻ ടീമിലെത്താനാണ് സാധ്യത. ലോർഡ്സിൽ മികച്ച റെക്കോർഡുള്ള ഇഷാന്ത് ശർമ്മയ്ക്കും സാധ്യതയുണ്ട്. ബാറ്റിംഗിൽ കൂടി പരിഗണിക്കാവുന്ന താക്കൂർ പുറത്തായതിനാൽ നാല് പേസർമാരുമായി ഇറങ്ങാൻ ഇന്ത്യ മടിച്ചേക്കും. അതുകൊണ്ട് തന്നെ താക്കൂറിനു പകരം അശ്വിനും മൂന്നാം പേസർ സിറാജിനു പകരം ഇഷാന്തും ടീമിലെത്തിയേക്കും.

ആദ്യ ടെസ്റ്റ് മഴ മൂലം ഉപേക്ഷിച്ചിരുന്നു. രണ്ടാം ഇന്നിംഗ്സിൽ 209 റൺസ് വിജയലക്ഷ്യവുമായി ഇറങ്ങിയ ഇന്ത്യ നാലാം ദിനം അവസാനിക്കുമ്പോൾ ഒരു വിക്കറ്റ് നഷ്ടത്തിൽ 52 റൺസ് എന്ന നിലയിലായിരുന്നു. 157 റൺസ് ആയിരുന്നു അവസാന ദിനത്തിൽ ഇന്ത്യയുടെ വിജയലക്ഷ്യം. പക്ഷേ, മഴ കാരണം ഇന്ന് ഒരു പന്ത് പോലും എറിയാനായില്ല.

രണ്ടാം ഇന്നിംഗ്സിലും ഓപ്പണർമാർ ചേർന്ന് ഇന്ത്യക്ക് ഭേദപ്പെട്ട തുടക്കം നൽകി. 34 റൺസിൻ്റെ കൂട്ടുകെട്ടിനു ശേഷം രാഹുൽ മടങ്ങി. 26 റൺസെടുത്ത രാഹുലിൻ്റെ സ്റ്റുവർട്ട് ബ്രോഡ് മടക്കിഅയക്കുകയായിരുന്നു. മൂന്നാം നമ്പറിലെത്തിയ പൂജാര ആക്രമിച്ച് കളിച്ചു. നാലാം ദിനം അവസാനിക്കുമ്പോൾ പൂജാരയും രോഹിതും 12 റൺസെടുത്ത് നിൽക്കുകയായിരുന്നു.

രണ്ടാം ഇന്നിങ്സിൽ ഇംഗ്ലണ്ട് 303 റൺസ് ആണ് നേടിയത്. ആദ്യ ഇന്നിങ്സിൽ ബാറ്റിങ്ങിൽ പരാജയപ്പെട്ട ഇംഗ്ലണ്ട് രണ്ടാം ഇന്നിങ്ങ്സിൽ മികച്ച പ്രകടനം നടത്തി. ജോ റൂട്ട് നേടിയ 109 റൺസിന്റെ ബലത്തിൽ ആണ് ഇംഗ്ലണ്ട് മികച്ച സ്‌കോർ നേടിയത്.

Story Highlight: stuart broad ruled out test india