മൂന്നാം ടെസ്റ്റിൽ നിന്ന് മാർക്ക് വുഡ് പുറത്ത്; പകരം സാഖിബ് മഹ്മൂദ് കളിച്ചേക്കും

ഇന്ത്യക്കെതിരായ മൂന്നാം ടെസ്റ്റിൽ നിന്ന് പേസർ മാർക്ക് വുഡ് പുറത്ത്. തോളിനേറ്റ പരുക്കിനെ തുടർന്നാണ് താരം ലീഡ്സിൽ നടക്കുന്ന ടെസ്റ്റിൽ നിന്ന് വിട്ടുനിൽക്കുക. താരം ടീമിനൊപ്പം തുടരും. നാലാം ടെസ്റ്റിൽ വുഡ് കളിക്കുമെന്നാണ് വിവരം. വുഡിനു പകരം സാഖിബ് മഹ്മൂദ് മൂന്നാം ടെസ്റ്റിൽ കളിച്ചേക്കും. താരത്തിൻ്റെ അരങ്ങേറ്റ ടെസ്റ്റാവും ഇത്. ഈ മാസം 25നാണ് മത്സരം ആരംഭിക്കുക. (Mark Wood out test)

74ആം ഓവറിൽ ഋഷഭ് പന്തിൻ്റെ ഒരു ഷോട്ട് തടയുന്നതിനിടെയാണ് വുഡിനു പരുക്കേറ്റത്. തുടർന്ന് താരം ഫീൽഡിൽ തുടരാതെ മടങ്ങിയിരുന്നു. അഞ്ചാം ദിനം നാല് ഓവറുകൾ കൂടി വുഡ് എറിഞ്ഞിരുന്നു.

പരുക്കേറ്റതിനെ തുടർന്ന് ജോഫ്ര ആർച്ചറും ക്രിസ് വോക്സും ടീമിൽ ഉൾപ്പെട്ടിരുന്നില്ല. മാനസികാരോഗ്യം പരിഗണിച്ച് ക്രിക്കറ്റിൽ നിന്ന് താത്കാലിക ഇടവേളയെടുത്ത ബെൻ സ്റ്റോക്സ് ടീമിൽ നിന്ന് വിട്ടുനിൽക്കുകയാണ്. രണ്ടാം ടെസ്റ്റിനു മുന്നോടിയായി നടന്ന പരിശീലന സെഷനിടെ പരുക്കേറ്റ സ്റ്റുവർട്ട് ബ്രോഡ് പരമ്പരയിൽ നിന്ന് തന്നെ പുറത്തായി. ഇവർക്കൊപ്പം വുഡ് കൂടി പുറത്താവുന്നത് ഇംഗ്ലണ്ട് ബൗളിംഗ് നിരയെ ദുർബലമാക്കും.

Read Also : മാർക്ക് വുഡിനു പരുക്ക്; മൂന്നാം ടെസ്റ്റിൽ കളിച്ചേക്കില്ല

രണ്ടാം ടെസ്റ്റിൽ ഇന്ത്യ 151 റൺസിന്റെ ജയം കുറിച്ചിരുന്നു. ഇന്ത്യ ഉയർത്തിയ 272 റൺസ് വിജയലക്ഷ്യം പിന്തുടർന്ന ഇംഗ്ലണ്ട് 51.5 ഓവറിൽ 120 റൺസിന് എല്ലാവരും പുറത്തായി. ഇതോടെ അഞ്ച് ടെസ്റ്റുകൾ ഉൾപ്പെടുന്ന പരമ്പരയിൽ ഇന്ത്യ 1–0ന് മുന്നിലെത്തി.

ആറിന് 181 റൺസുമായി അവസാന ദിനം ബാറ്റിങ് പുനരാരംഭിച്ച ഇന്ത്യയെ, അവിശ്വസനീയ ചെറുത്തുനിൽപ്പിലൂടെ മികച്ച ലീഡി‌ലേക്കു നയിച്ചത് മുഹമ്മദ് ഷമി- ജസ്പ്രീത് ബുമ്ര കൂട്ടുകെട്ടാണ്. ഒൻപതാം വിക്കറ്റിൽ 120 പന്തിൽ 89 റൺസ് കൂട്ടിച്ചേർത്ത ഇവരുടെ മികവിൽ ഇന്ത്യ എട്ടു വിക്കറ്റ് നഷ്ടത്തിൽ 298 റൺസെടുത്ത് രണ്ടാം ഇന്നിങ്സ് ഡിക്ലയർ ചെയ്തിരുന്നു.

നാലു വിക്കറ്റ് വീഴ്ത്തിയ മുഹമ്മദ് സിറാജ്, മൂന്നു വിക്കറ്റ് എടുത്ത ജസ്പ്രീത് ബുമ്ര, രണ്ടു വിക്കറ്റ് വീഴ്ത്തിയ ഇഷാന്ത് ശർമ, ഒരു വിക്കറ്റ് വീഴ്ത്തിയ മുഹമ്മദ് ഷമി എന്നിവർ ചേർന്നാണ് ലോർഡ്സിൽ ഇന്ത്യയ്ക്ക് ചരിത്ര വിജയമൊരുക്കിയത്. 60 പന്തിൽ അഞ്ച് ഫോറുകൾ ഉൾപ്പെടെ 33 റൺസെടുത്ത ക്യാപ്റ്റൻ ജോ റൂട്ടാണ് ഇംഗ്ലണ്ടിന്റെ ടോപ് സ്കോറർ. റോറി ബേൺസ് (0), ഡൊമിനിക് സിബ്‌ലി (0), ഹസീബ് ഹമീദ് (9), ജോണി ബെയർസ്റ്റോ (2), സാം കറൻ (0), ജയിംസ് ആൻഡേഴ്സൻ (0) എന്നിവർ നിരാശപ്പെടുത്തി.

Story Highlight: Mark Wood ruled out 3rd test