ഏറ്റവും ദുർബലനായ മുഖ്യമന്ത്രിയായ പിണറായിയെ പ്രകീർത്തിക്കുന്ന കെ.വി. തോമസിനെ അം​ഗീകരിക്കാനാവില്ലെന്ന് ചെന്നിത്തല

കേരളം കണ്ട ഏറ്റവും ദുർബലനായ മുഖ്യമന്ത്രി പിണറായി വിജയനെ പ്രകീർത്തിക്കുന്ന കെ.വി. തോമസിനെ അം​ഗീകരിക്കാനാവില്ലെന്നും നടപടിയെടുക്കേണ്ടത് ഹൈക്കമാൻഡാണെന്നും മുൻ പ്രതിപക്ഷ നേതാവ് രമേശ് ചെന്നിത്തല പറഞ്ഞു. ഒരു രാഷ്ട്രീയ പ്രവർത്തകന് കിട്ടാവുന്നതിൽ ഏറ്റവും കൂടുതൽ അം​ഗീകാരം ലഭിച്ചിട്ടുള്ളയാളാണ് കെ.വി. തോമസ്. കേരളത്തിന്റെ മുഖ്യമന്ത്രി ഇതുപോലുള്ള മുതിർന്ന കോൺ​ഗ്രസ് നേതാക്കളെ കാലുമാറ്റാനായി നടക്കുകയാണെന്നാണ് ഈ സംഭവത്തിലൂടെ വെളിവാകുന്നത്. തോമസ് മാഷ് പോയതിൽ ദുഖമുണ്ട്. എന്നാൽ ഇത്തരം കുതന്ത്രങ്ങളിലൂടെ കോൺ​ഗ്രസിനെ തകർക്കാൻ പിണറായിക്കും സി.പി.ഐ.എമ്മിനും കഴിയില്ല. കൂടുതൽ ആവേശത്തോടെ കോൺ​ഗ്രസ് പ്രവർത്തകർ ഒറ്റക്കെട്ടായി മുന്നോട്ടുപോകുമെന്നും അദ്ദേഹം വ്യക്തമാക്കി.

സി.പി.ഐ.എം പാർട്ടി കോൺ​ഗ്രസ് സെമിനാറിൽ പങ്കെടുക്കണമെന്ന് വ്യക്തിപരമായി ആ​ഗ്രഹമുണ്ടായിരുന്നെന്ന് ശശി തരൂർ എം.പി പ്രതികരിച്ചിരുന്നു. അച്ചടക്കമുള്ള പാർട്ടി പ്രവർത്തകനെന്ന നിലയിലാണ് കോൺ​ഗ്രസ് അദ്ധ്യക്ഷ സോണിയാ ​ഗാന്ധിയുടെ നിർദേശം അം​ഗീകരിച്ചത്. ഇത്തരം പൊതു വിഷയങ്ങൾ അവതരിപ്പിക്കപ്പെടുന്ന സെമിനാറുകളിൽ സാധാരണ ​ഗതിയിൽ പങ്കെടുക്കാറാണ് പതിവ്. പാ‍ർട്ടി വിലക്ക് ലംഘിച്ച് സെമിനാറിൽ പങ്കെടുത്ത കെ വി തോമസിന്‍റെ നിലപാടിനോട് പ്രതികരിക്കുന്നില്ലെന്നും അദ്ദേഹം പറഞ്ഞു.

Read Also : സിപിഐഎം കാലത്തിന്റെ ചുവരെഴുത്ത് മനസിലാക്കി പ്രവര്‍ത്തിക്കണം; രമേശ് ചെന്നിത്തല

കെ.വി. തോമസിന്റെ വിഷയത്തിൽ നടപടിയെടുക്കേണ്ടത് ഹൈക്കമാൻഡാണെന്നും കെ റെയിലിൽ കെ.വി. തോമസിന്റെ നിലപാട് വിവരമില്ലായ്മയാണെന്നും കെ.പി.സി.സി പ്രസിഡന്റ് കെ. സുധാകരൻ പ്രതികരിച്ചിരുന്നു. പാർട്ടിയുടെ പ്രഖ്യാപിത ശത്രുവാണ് അദ്ദേഹം. ഈ വിഷയത്തിൽ ഹൈക്കമാൻഡിന് കത്തയച്ചിട്ടുണ്ട്. മുഖ്യമന്ത്രി പിണറായിയെ പ്രശംസിച്ചത് രാഷ്ട്രീയത്തിലെ തറവാടിത്തമില്ലായ്മയാണ്. ​ഗുതുതര അച്ചടക്ക ലംഘനമാണ് നടത്തിയത്. പാർട്ടി പ്രവർത്തകരുടെ വികാരം വ്രണപ്പെട്ടതിനെ തുടർന്നാണ് നടപടി. അധികാര മോ​ഹിയായ കെ.വി. തോമസ് സ്ഥാനമാനങ്ങൾക്ക് വേണ്ടിയാണ് ഈ നിലപാട് കൈക്കൊള്ളുന്നതെന്നും സുധാകരൻ വിമർശിച്ചു.

വലിയ വിവാദങ്ങൾക്കൊടുവിലാണ് മുതിർന്ന കോൺ​ഗ്രസ് നേതാവ് കെ.വി തോമസ് കണ്ണൂരിൽ നടക്കുന്ന സി.പി.ഐ.എം പാർട്ടി കോൺ​ഗ്രസ് സെമിനാറിൽ പങ്കെടുത്തത്. ഹൈക്കമാൻഡ് രണ്ട് തവണ സെമിനാറിൽ പങ്കെടുക്കരുതെന്ന് ആവശ്യപ്പെട്ടിട്ടും കെ.വി. തോമസ് അത് നിരസിക്കുകയായിരുന്നു. മുഖ്യമന്ത്രി പിണറായി വിജയൻ, സി.പി.ഐ.എം സംസ്ഥാന സെക്രട്ടറി കോടിയേരി ബാലകൃഷ്ണൻ എന്നിവർക്കൊപ്പമാണ്
അദ്ദേഹം വേദിപങ്കിട്ടത്.

Story Highlights: Ramesh Chennithala against KV Thomas