ധവാൽ കുൽക്കർണിയെ മുംബൈ ഇന്ത്യൻസ് ടീമിലെത്തിക്കുമെന്ന് റിപ്പോർട്ട്

മുൻ താരം ധവാൽ കുൽക്കർണിയെ മുംബൈ ഇന്ത്യൻസ് ടീമിലെത്തിക്കുമെന്ന് റിപ്പോർട്ട്. സീസണിൽ മോശം പ്രകടനം നടത്തുന്ന മുംബൈ എങ്ങനെയും തിരികെയെത്താനുള്ള ശ്രമത്തിലാണ്. ഇത്തവണത്തെ മെഗാ ലേലത്തിൽ ആരും ടീമിലെടുക്കാതിരുന്ന താരം നിലവിൽ സ്റ്റാർ സ്പോർട്സ് കമൻ്ററി പാനലിൽ ഉൾപ്പെട്ടിട്ടുണ്ട്. നിലവിൽ 6 മത്സരങ്ങൾ കളിച്ച മുംബൈയ്ക്ക് ഒരു മത്സരത്തിൽ പോലും ഇതുവരെ വിജയിക്കാൻ സാധിച്ചിട്ടില്ല.

2008 മുതൽ 2013 വരെ മുംബൈ ഇന്ത്യൻസിൽ കളിച്ച കുൽക്കർണി പിന്നീട് രാജസ്ഥാൻ റോയൽസ്, ഗുജറാത്ത് ലയൺസ് എന്നീ ടീമുകൾക്കായും ബൂട്ടണിഞ്ഞിട്ടുണ്ട്. മുംബൈ ഇന്ത്യൻസിനായി ആകെ 92 മത്സരങ്ങൾ കളിച്ച താരം 86 വിക്കറ്റുകളാണ് നേടിയിട്ടുള്ളത്. 2020, 21 സീസണുകളിൽ മുംബൈ ഇന്ത്യൻസിലേക്ക് തിരികെയെത്തിയ താരം വെറും ഒരു മത്സരത്തിൽ മാത്രമാണ് കളിച്ചത്. എന്നാൽ, ഇക്കുറി കുൽക്കർണിയ്ക്ക് കൂടുതൽ അവസരങ്ങൾ ലഭിക്കുമെന്നാണ് റിപ്പോർട്ട്. കുൽക്കർണിയെ ടീമിൽ ഉൾപ്പെടുത്താൻ ക്യാപ്റ്റൻ രോഹിത് ശർമ്മ ഏറെ ആഗ്രഹിക്കുന്നുണ്ടെന്നും റിപ്പോർട്ടുകൾ സൂചിപ്പിക്കുന്നു. 33 വയസുകാരനായ താരത്തിൻ്റെ മത്സരപരിചയം ഉപയോഗപ്പെടുത്താമെന്നാണ് മുംബൈ ഇന്ത്യൻസിൻ്റെ കണക്കുകൂട്ടൽ.

Story Highlights: dhawal kulkarni mumbai indians ipl