അവിശ്വസനീയം; ഓസ്ട്രേലിയക്കെതിരെ ഇന്നിംഗ്സ് ജയവുമായി ശ്രീലങ്ക

ഓസ്ട്രേലിയക്കെതിരായ രണ്ടാം ടെസ്റ്റിൽ ഇന്നിംഗ്സ് ജയവുമായി ശ്രീലങ്ക. ഇന്നിംഗ്സിനും 39 റൺസിനുമാണ് ശ്രീലങ്കയുടെ ജയം. രണ്ടാം ഇന്നിംഗ്സിൽ 190 റൺസ് ലീഡ് വഴങ്ങി ഇറങ്ങിയ ഓസ്ട്രേലിയ 151 റൺസിന് ഓൾഔട്ടാവുകയായിരുന്നു. ശ്രീലങ്കക്കായി കന്നി ടെസ്റ്റിനിറങ്ങിയ പ്രബാത് ജയസൂര്യ രണ്ട് ഇന്നിംഗ്സിലും ആറ് വിക്കറ്റ് വീതം വീഴ്ത്തി. (srilanka won innings australia test)

Read Also: ഗുജറാത്തിൽ വ്യാജ ഐപിഎൽ; റഷ്യക്കാരെ പറ്റിച്ച് തട്ടിയത് ലക്ഷങ്ങൾ; ഒടുവിൽ അറസ്റ്റ്

ആദ്യ ഇന്നിംഗ്സിൽ ഓസ്ട്രേലിയ 364 റൺസെടുത്ത് ഓൾഔട്ടായിരുന്നു. സ്റ്റീവ് സ്മിത്ത് (145), മാർനസ് ലബുഷെയ്ൻ (104) എന്നിവരാണ് ഓസീസിനായി തിളങ്ങിയത്. മറുപടി ബാറ്റിംഗിൽ ശ്രീലങ്ക 554 റൺസെടുത്ത് ഓളൗട്ടായി. ദിനേഷ് ഛണ്ഡിമലിൻ്റെ (206) കന്നി ഇരട്ട സെഞ്ചുറിയാണ് ശ്രീലങ്കയ്ക്ക് കൂറ്റൻ സ്കോർ സമ്മാനിച്ചത്. ക്യാപ്റ്റൻ ദിമുത് കരുണരത്നെ (86), കുശാൽ മെൻഡിസ് (85), കമിന്ദു മെൻഡിസ് (61), ആഞ്ചലോ മാത്യൂസ് (52) എന്നിവരും ശ്രീലങ്കക്കുവേണ്ടി തിളങ്ങി. രണ്ടാം ഇന്നിംഗ്സിൽ ബാറ്റിംഗിനിറങ്ങിയ ഓസ്ട്രേലിയ ചീട്ടുകൊട്ടാരം പോലെ തകർന്നു. 32 റൺസെടുത്ത മാർനസ് ലബുഷെയ്ൻ ടോപ്പ് സ്കോററായപ്പോൾ ഓസീസ് നിരയിൽ ആകെ 6 പേരാണ് ഇരട്ടയക്കം കടന്നത്.

Story Highlights: srilanka won innings australia test