ചീഫ് സെക്രട്ടറിക്കെതിരെ ​പരാതിയുമായി മന്ത്രി എ.കെ ശശീന്ദ്രൻ; മുഖ്യമന്ത്രിയെ അതൃപ്തി അറിയിച്ചു

ആറളം ഫാമിലെ ആനമതിൽ നിർമ്മാണവുമായി ബന്ധപ്പെട്ട് ചീഫ്സെക്രട്ടറിക്കെതിരെ മന്ത്രിസഭയിൽ നിന്ന് വീണ്ടും പരാതി. മന്ത്രി എ.കെ ശശീന്ദ്രനാണ് ചീഫ്സെക്രട്ടറിക്കെതിരെ ​ഗുരുതര ആരോപണങ്ങളുമായി രം​ഗത്തെത്തിയത്. നേരത്തെ സപ്ലൈക്കോയിൽ ശ്രീറാം വെങ്കിട്ടരാമനെ നിയമിച്ചത് അറിയിച്ചിരുന്നില്ലെന്ന് മന്ത്രി ജി.ആർ അനിലും മുഖ്യമന്ത്രിക്ക് പരാതി നൽകിയിരുന്നു. ചീഫ് സെക്രട്ടറിയുടെ നടപടികളിൽ കടുത്ത അതൃപ്തിയാണ് മന്ത്രി എ.കെ ശശീന്ദ്രൻ രേഖപ്പെടുത്തിയത്. ( AK Saseendran complaint Chief Secretary ).

വിദഗ്ധസമിതി രൂപീകരിച്ചതും മതിൽ പ്രായോഗികമല്ലെന്ന് ഹൈക്കോടതിയെ ധരിപ്പിച്ചതും വനംവകുപ്പിനെ അറിയിച്ചില്ലെന്നാണ് മന്ത്രി പറയുന്നത്. ചീഫ് സെക്രട്ടറിയുടെ നടപടികളിൽ എ.കെ. ശശീന്ദ്രൻ മുഖ്യമന്ത്രിയെ അതൃപ്തി അറിയിക്കുകയും ചെയ്തു. വകുപ്പ് അറിയാത്ത കാര്യത്തിൽ പഴി കേൾക്കേണ്ടി വരുകയാണെന്ന് മന്ത്രി വ്യക്തമാക്കുന്നു. ആറളം ഫാമിലെ പ്രശ്നങ്ങൾ ചർച്ച ചെയ്യാൻ ചേർന്ന ഓൺലൈൻ യോഗത്തിലാണ് മന്ത്രിമുടെ വിമർശനം.

Read Also: കാട്ടാനശല്യം വ്യാപകം; കണ്ണൂർ ആറളം ഫാമിൽ വരുന്നു ആനപ്രതിരോധമതിൽ

കണ്ണൂർ ആറളം ഫാമിൽ കാട്ടാനശല്യം തടയാൻ ആനപ്രതിരോധ മതിൽ നിർമ്മിക്കാൻ മുഖ്യമന്ത്രി പിണറായി വിജയന്റെ അധ്യക്ഷതയിൽ ചേർന്ന ഉന്നതതലയോഗം തീരുമാനിച്ചു. ആനമതിലാണ് ആറളത്തെ വന്യജീവി ശല്യം പൂർണ്ണമായി പ്രതിരോധിക്കാനുള്ള മികച്ച മാർഗ്ഗമെന്നു പ്രദേശവാസികളും വിവിധ രാഷ്ട്രീയ- സംഘടനാ- തൊഴിലാളി യൂണിയനുകളും പറഞ്ഞിരുന്നു.

മതിൽ നിലവിലുള്ള ഭാഗത്തുകൂടി ആനകൾ ഫാമിൽ പ്രവേശിക്കുന്നില്ലെന്ന അനുഭവത്തിന്റെ പശ്ചാത്തലത്തിലാണ് സ്ഥലവാസികൾ ഈ ആവശ്യം ഉന്നയിച്ചത്. ആന മതിൽ നിർമ്മിച്ചാൽ ആന മറ്റൊരു ഭാഗത്തേക്ക് മാറുകയാണെങ്കിൽ നേരത്തെ വിദഗ്ധസമിതി നിർദ്ദേശിച്ച കരുതൽ നടപടികൾ അവിടെ സ്വീകരിക്കും.

യോഗത്തിൽ വനംവകുപ്പ് മന്ത്രി എ.കെ ശശീന്ദ്രൻ, പട്ടികജാതി- പട്ടികവർഗ്ഗ വകുപ്പ് മന്ത്രി കെ. രാധാകൃഷ്‌ണൻ, ചീഫ് സെക്രട്ടറി ഡോ. വി.പി ജോയ്, ചീഫ് വൈൽഡ് ലൈഫ് വാർഡൻ ഗംഗാ സിംഗ്, കണ്ണൂർ ജില്ലാ കളക്ടർ എസ്. ചന്ദ്രശേഖർ തുടങ്ങിയവർ സംസാരിച്ചു.

Story Highlights: AK Saseendran complaint Chief Secretary