മൈക്ക് കേസ്; നടപടി സുരക്ഷാ ആക്ടിന്റെ ഭാഗം; കോൺഗ്രസ് നേതൃത്വത്തിന് പക്വത കുറവെന്ന് ഇ പി ജയരാജൻ

മൈക്ക് തകരാറായ സംഭവത്തിൽ കേസെടുത്തതിൽ പ്രതികരണവുമായി എൽ ഡി എഫ് കൺവീനർ ഇ പി ജയരാജൻ. നടപടി സുരക്ഷാ ആക്ടിന്റെ ഭാഗമാണ്. എഫ്‌ഐആറിൽ ആരുടേയും പേരില്ല. അന്വേഷണം നടത്തുന്നതിൽ കോൺഗ്രസിന് എന്താണ് പ്രശ്‌നം. കോൺഗ്രസ് നേതൃത്വത്തിന് പക്വത കുറവാണെന്നും ഇ പി ജയരാജൻ പറഞ്ഞു.(E P Jayarajan on Pinarayi Vijayan Mike Case)

എന്നാൽ മൈക്ക് വിവാദത്തില്‍ തുടർ നടപടി പാടില്ലെന്ന് മുഖ്യമന്ത്രി പൊലീസിന് നിർദേശം നൽകി. സുരക്ഷാ പരിശോധന അല്ലാതെ മറ്റൊരു നടപടിയും പാടില്ല. പൊലീസ് നടപടി വിവാദമായ സാഹചര്യത്തിലാണ് മുഖ്യമന്ത്രിയുടെ ഇടപെടൽ.

Read Also: ‘തുടർ നടപടി വേണ്ട’ മൈക്ക് വിവാദത്തില്‍ പൊലീസിന് നിർദേശവുമായി മുഖ്യമന്ത്രി

കെപിസിസി സംഘടിപ്പിച്ച ഉമ്മൻ ചാണ്ടിയുടെ അനുസ്മരണ പരിപാടിയില്‍ മുഖ്യമന്ത്രി പ്രസംഗിക്കുമ്പോൾ മൈക്കിന്‍റെ ശബ്ദം തടസ്സപ്പെട്ടതിനാണ് പൊലീസ് കേസെടുത്തത്. പൊതുസുരക്ഷയെ ബാധിക്കുന്ന തരത്തിൽ പ്രതി പ്രവർത്തിച്ചുവെന്നാണ് എഫ്ഐആറിലുള്ളത്.

എന്നാൽ എഫ്ഐആറിൽ ആരെയും പ്രതിയാക്കിയിട്ടില്ല. മുഖ്യമന്ത്രി പ്രസംഗിക്കുമ്പോൾ മൈക്കിൽ ഹൗളിംഗ് വരുത്തി സുരക്ഷാ പ്രശ്നമുണ്ടാക്കിയെന്നും എഫ്ഐആറിൽ പറയുന്നു. സംഭവത്തിൽ പൊലീസ് കേസെടുത്തിരുന്നു. മൈക്ക്, ആംബ്ലിഫയർ, വയർ എന്നിവ പൊലീസ് കസ്റ്റഡിയിലെടുത്തിരുന്നു. ഇന്ന് ഇലട്രിക്കൽ ഇൻസ്പെക്ടറേറ്റ് പരിശോധന നടത്തും.

Story Highlights: E P Jayarajan on Pinarayi Vijayan Mike Case