‘കേരളം മികച്ച ടീമാണ്, കർണാടക ടീം വിട്ടപ്പോൾ ആദ്യ ശ്രമം കേരളത്തിനായി കളിക്കാൻ ആയിരുന്നു, എന്നാൽ അത് നടന്നില്ല’: വിദർഭ താരം കരുൺ നായർ

രഞ്ജി ട്രോഫിയിൽ കിരീടം നേടാൻ ആവുമെന്ന് വിദർഭയുടെ മലയാളി താരം കരുൺ നായർ 24നോട്‌. സീസണിൽ ടീമിനും വ്യക്തിപരമായി തനിക്കും മികച്ച പ്രകടനം കാഴ്ചവയ്ക്കാൻ സാധിച്ചു. ഫൈനലിലും അത് തുടരാൻ ആകും എന്ന് പ്രതീക്ഷ. കേരളത്തിനെതിരായി ഫൈനൽ കളിക്കുന്നതിൽ വലിയ സന്തോഷമുണ്ട്. കേരളം ഫൈനൽ എത്തിയതിൽ സന്തോഷവാനാണ് താനെന്നും അദ്ദേഹം പറഞ്ഞു.

കർണാടക ടീം വിട്ടപ്പോൾ ആദ്യ ശ്രമം കേരളത്തിനായി കളിക്കാൻ ആയിരുന്നു. എന്നാൽ അത് നടന്നില്ല. ഭാവിയിൽ കേരളത്തിനായി കളിക്കാൻ ആകും എന്നാണ് പ്രതീക്ഷ എന്നും കരുൺ നായർ പറഞ്ഞു. കേരളം മികച്ച ടീമാണ്. ഫൈനലിൽ കടുത്ത പോരാട്ടം പ്രതീക്ഷിക്കുന്നതായും കരുൺ നായർ 24 നോട്‌ പറഞ്ഞു.

ചരിത്ര നേട്ടം ലക്ഷ്യമിട്ട് രഞ്ജി ട്രോഫി ഫൈനലിൽ കേരളം നാളെ വിദർഭയ്ക്കെതിരെ ഇറങ്ങും. രാവിലെ 9.30നാണ് മത്സരം തുടങ്ങുക. ടൂർണ്ണമെന്‍റിൽ ഇതുവരെ തോൽവി അറിയാതെത്തിയ ടീമുകളാണ് രണ്ടും. കഴിഞ്ഞ തവണ ഫൈനലിൽ മുംബൈയോട് കൈവിട്ട കിരീടം തേടിയാണ് വിദർഭയുടെ വരവ്. മറുവശത്ത് ആദ്യ കിരീടമെന്ന ചരിത്ര നേട്ടം ലക്ഷ്യമിട്ട് കേരളവും.ഫൈനലിൽ കേരളം കഴിഞ്ഞ മൽസരങ്ങളിൽ കളിച്ച ടീമിൽ നിന്നും കാര്യമായ മാറ്റങ്ങൾ വരുത്താനിടയില്ല.

സൽമാൻ നിസാറും, മുഹമ്മദ് അസറുദ്ദീനും, ജലജ് സക്സേനയുമടക്കമുള്ള മധ്യനിരയും വാലറ്റവും മികച്ച ഫോമിലാണ്. മുൻനിര കൂടി ഫോമിലേക്ക് ഉയർന്നാൽ കേരളത്തിന്‍റെ ബാറ്റിങ് കരുത്ത് കൂടും. കഴിഞ്ഞ മത്സരത്തിലൂടെ ക്യാപ്റ്റൻ സച്ചിൻ ബേബിയും ഫോമിലേക്ക് മടങ്ങിയെത്തിയിട്ടുണ്ട്.

കേരളത്തിന് കിരീടം നേടാനാകുമെന്ന് പ്രതീക്ഷയെന്ന് ക്യാപ്റ്റൻ സച്ചിൻ ബേബി ട്വന്റിഫോറിനോട്‌ പറഞ്ഞു. കേരളത്തിന്റെ ഒരുക്കങ്ങളെല്ലാം മികച്ചത്. കഴിഞ്ഞ മത്സരങ്ങളിലെ പ്രകടനങ്ങൾ ആത്മവിശ്വാസം നൽകുന്നു. വിദർഭ കരുത്തരെങ്കിലും ഭയക്കുന്നില്ല. എല്ലാ മലയാളികളുടെയും പ്രാർത്ഥനയും പിന്തുണയും ടീമിന് ഉണ്ടാകണമെന്നും കേരള നായകൻ ട്വന്റിഫോറിനോട്‌ പറഞ്ഞു. കപ്പ് നേടും വരെ പോരാടും. കേരള ടീമിനൊപ്പമുള്ള ഒന്നര പതിറ്റാണ്ട് യാത്രയിലെ ഏറ്റവും സന്തോഷമുള്ള നിമിഷമാണിത്.

കോച്ചിന്റെ പരിശീലനമുറകളാണ് കേരളത്തിന്റെ ബാറ്റിങ് ശക്തിയാർജിക്കാൻ കാരണം. അവസാന ക്യാച്ച് കൈകളിൽ എത്തിയത് പറഞ്ഞറിയിക്കാൻ പറ്റാത്തത്ര സന്തോഷമുള്ള നിമിഷമാണെന്നും സച്ചിൻ ബേബി പറഞ്ഞു. സച്ചിൻ ബേബിയുടെ പട രചിച്ചത് പുതു ചരിത്രമാണ്. 74 വർഷത്തെ കാത്തിരിപ്പിനൊടുവിൽ ആദ്യമായാണ് കേരളം രഞ്ജി ട്രോഫി ഫൈനൽ കളിക്കുന്നത്.

വിദര്‍ഭയുടെ തട്ടകമായ നാഗ്പൂരിലാണ് ഫൈനല്‍ മത്സരമെന്നതും കേരളത്തിന് വലിയ തലവേദന ഉയര്‍ത്തുന്ന കാര്യമാണ്. എന്നാല്‍ പല വെല്ലുവിളികളേയും മറികടന്ന് ചരിത്ര കുതിപ്പാണ് ഇത്തവണ കേരളം കാഴ്ചവെക്കുന്നത്. അതുകൊണ്ടുതന്നെ കപ്പിലേക്കെത്താന്‍ കേരളത്തിന് സാധിക്കുമെന്ന് തന്നെയാണ് എല്ലാവരുടേയും പ്രതീക്ഷ.

Story Highlights : Karun Nair about Ranji Trophy finals