‘കുട്ടികള്‍ ഏകാന്തത അനുഭവിക്കുന്നു, തിരുത്തല്‍ വേണ്ടത് വീട്ടില്‍ നിന്ന്‌’; SKN40 ജനകീയ യാത്രയിൽ നടൻ മധു

കുട്ടികള്‍ വീടുകളിൽ ഏകാന്തത അനുഭവിക്കുന്നു. തിരുത്തല്‍ വേണ്ടത് വീട്ടില്‍ നിന്നെന്ന് SKN40 ജനകീയ യാത്രയിൽ നടൻ മധു. പണ്ട് കൂട്ടുകുടുംബ സമയത്ത് വീട്ടിലെ ആളുകളുമായി കുട്ടികൾക്ക് ബന്ധമുണ്ട്. ഇപ്പോൾ അതല്ല അവസ്ഥ. കുട്ടികൾ വീടുകളിൽ ഏകാന്തത അനുഭവിക്കുന്നു. വീട്ടുകാരുമായി കുട്ടികൾക്ക് വേണ്ടത് ആഴത്തിലുള്ള അടുപ്പമാണെന്നും അദ്ദേഹം വ്യക്തമാക്കി.

തിരുത്തൽ ആരംഭിക്കുന്നത് വീടുകളിൽ നിന്ന് തന്നെ വേണം. എത്രത്തോളം കുട്ടികളും വീട്ടുകാരുമായി ബന്ധമുണ്ടോ അത്രത്തോളം ലഹരിയുടെ ഉപയോഗത്തിൽ നിന്നും പിന്മാറാം. ഏകാന്തത വരുമ്പോൾ ആരെങ്കിലും എന്തെങ്കിലും ചെയ്താൽ കുട്ടികൾ അതുവഴിക്കെ പോകൂ.

അച്ഛനും അമ്മയും കൂട്ടികളെ കൂട്ടുകാരെ പോലെ സമീപിക്കണം. എല്ലാകാര്യങ്ങളിലും അവരെ ഉൾപ്പെടുത്തണം. അതുവഴി അവരുടെ ഏകാന്തത കുറയ്ക്കാം. കുട്ടികളിൽ സ്മാർട്ട് ഫോണിന്റെ പങ്ക് വളരെ കൂടുതലാണ്. അത് പാടില്ല. കുട്ടികൾക്ക് ആവശ്യം മാതാപിതാക്കൾ തമ്മിലുള്ള അടുപ്പമാണെന്നും അദ്ദേഹം പറഞ്ഞു. SKN നടത്തുന്ന ഈ യാത്ര വളരെ പ്രയോജനപ്രദമാണ്. SKN 40 ജനകീയ യാത്രയ്ക്ക് എല്ലാ പിന്തുണയും ആശംസയും നേരുന്നുവെന്നും നടൻ മധു വ്യക്തമാക്കി.

അതേസമയം SKN40 ജനകീയ യാത്രയ്ക്ക് തിരുവനന്തപുരത്ത് തുടക്കമായി. ഉദ്ഘാടനം നിര്‍വഹിച്ചത് അമ്മമാരാണ്. രാഷ്ട്രീയ സാമൂഹിക സാംസ്കാരിക രംഗത്തെ പ്രമുഖർ ചടങ്ങിൽ പങ്കെടുത്തു.

SKN 40 ജനകീയ യാത്രയുടെ റാലി കവടിയാറിൽ നിന്നുമാണ് ആരംഭിച്ചത്. ഒരുമാസം നീണ്ടുനിൽക്കുന്ന യാത്ര ഏപ്രിൽ 26ന് അവസാനിക്കും. ജനകീയ യാത്രയ്ക്ക് മുഖ്യമന്ത്രി പിണറായി വിജയൻ ആശംസ നേർന്നു. അരുത് ലഹരി, അരുത് അക്രമം ക്യാമ്പയിന്റെ വിവരങ്ങൾ സർക്കാരുമായി പങ്കുവെക്കണമെന്ന് മുഖ്യമന്ത്രി അറിയിച്ചു.

കവടിയാറിൽ നിന്ന് വമ്പിച്ച റാലിയോടെയാണ് പര്യടനത്തിന് തുടക്കം കുറിച്ചത്. അരുത് ലഹരി അരുത് അക്രമം ക്യാമ്പയിന് അൽപസമയത്തിനകം തുടക്കമാകും. വൈകിട്ട് ആറ് മണിക്ക് തിരുവനന്തപുരം ടാഗോർ തീയറ്ററിൽ ആണ് ഉദ്ഘാടനം. അരുത് അക്രമം, ലഹരി എന്ന സന്ദേശമുയർത്തിയാണ് കേരള യാത്ര സംഘടിപ്പിക്കുന്നത്. രണ്ട് ഘട്ടങ്ങളിലായി 14 ജില്ലകളിലും പര്യടനം നടത്തും. ഗായിക സിത്താര കൃഷ്ണകുമാറിന്റെ ബാൻഡായ പ്രൊജക്ട് മലബാറിക്കസ് ഉദ്ഘാടന രാവിന് മിഴിവേകും.

ലഹരിവിരുദ്ധ സന്ദേശം സമൂഹത്തിന്റെ എല്ലാ തട്ടുകളിലും എത്തിക്കുക എന്നതാണ് SKN40 കേരള യാത്രയുടെ പ്രധാന ലക്ഷ്യം. കേരളത്തിൽ സിന്തറ്റിക് ലഹരി പദാർഥങ്ങൾ ഉൾപ്പെടെ വ്യാപകമാവുകയും അക്രമങ്ങൾ കൂടുകയും ചെയ്യുമ്പോൾ, പ്രതിരോധം തീർക്കേണ്ടത് നാം ഓരോരുത്തരുടെയും കടമയാണ്. അതിനുള്ള ജനകീയ സംവാദ വേദി തുറക്കുകയാണ് ട്വന്റിഫോർ.

വിവിധ മേഖലകളിലുള്ളവരുമായി നേരിട്ട് സംവദിച്ച് സമൂഹത്തെ ഗ്രസിക്കുന്ന പ്രശ്നങ്ങൾക്ക് എതിരെ ജനകീയ മുന്നേറ്റം സാധ്യമാക്കാനുള്ള ഉദ്യമമാണ് എസ്കെഎൻ40 റോഡ് ഷോ. യുവാക്കളെ കുടുക്കുന്ന അദൃശ്യമായ ലഹരി വലയുടെ കണ്ണികള്‍ കണ്ടെത്താനും നാടിനെ വിറപ്പിക്കുന്ന അക്രമങ്ങൾ ഒഴിവാക്കാനുമുള്ള ക്രിയാത്മകമായ ചര്‍ച്ചകള്‍ റോഡ് ഷോയുടെ ഭാഗമായി നടക്കും.

ലഹരിയില്‍ നിന്ന് കുട്ടികളെ തിരികെപ്പിടിക്കാന്‍ മാതാപിതാക്കളെ അണിനിരത്തി കര്‍മപരിപാടികള്‍ ആലോചിക്കും. ഈ ഉദ്യമത്തിൽ നിങ്ങൾക്കും പങ്കുചേരാം. ആർ ശ്രീകണ്ഠൻ നായരുമായി ആശയങ്ങൾ പങ്കുവെക്കാം.

Story Highlights : SKN 40 Actor Madhu Praises the Campaign