അക്രമങ്ങൾക്കും ലഹരിക്കുമെതിരെ ട്വന്റിഫോർ; ‘SKN 40’ ജനകീയ യാത്ര ആലപ്പുഴയിൽ രണ്ടാംദിനം

വമ്പിച്ച പിന്തുണ ഏറ്റുവാങ്ങി 24 ചീഫ് എഡിറ്റർ ആർ ശ്രീകണ്ഠൻ നായർ നടത്തുന്ന ലഹരി വിരുദ്ധ യാത്ര SKN 40 ആലപ്പുഴ ജില്ലയിൽ ഇന്ന് രണ്ടാം ദിവസം പര്യടനം നടത്തും. പുന്നമട ഫിനിഷിംഗ് പോയിന്റിൽ തുടങ്ങുന്ന മോണിംഗ് ഷോയിൽ ലഹരിക്കെതിരെ സൈക്കിൾ തോണും ചെസ്സ് ടൂർണമെന്റും സംഘടിപ്പിക്കും.

ലഹരി വിരുദ്ധ ക്യാമ്പയിനുമായി കുട്ടനാട്ടിലെ വിവിധ കരകളിൽ 24 ടീമും ചീഫ് എഡിറ്ററും സന്ദർശിക്കും. ഉച്ചക്ക് 12 നു ആലപ്പുഴ മിനർവ കോളജ് ഹാളിൽ വിദ്യാർത്ഥികളും പൊലീസ് റിട്ടയേർഡ് അസോസിയേഷൻ പ്രതിനിധികളും ലഹരി വിരുദ്ധ യാത്രയ്ക്ക് ഐക്യദാർഢ്യം പ്രഖ്യാപിക്കും. ഉച്ചക്ക് 3നു ചേർത്തല KVM കോളജ് ഓഫ് നഴ്സിംഗിൽ നടക്കുന്ന ലഹരി വിരുദ്ധ പരിപാടിക്ക് ശേഷം തുറവൂർ തൈക്കാട്ടുശ്ശേരി പാർക്കിൽ സമാപന സമ്മേളനം.

ലഹരിവിരുദ്ധ സന്ദേശം സമൂഹത്തിന്റെ എല്ലാ തട്ടുകളിലും എത്തിക്കുക എന്നതാണ് SKN40 കേരള യാത്രയുടെ പ്രധാന ലക്ഷ്യം. കേരളത്തിൽ സിന്തറ്റിക് ലഹരി പദാർഥങ്ങൾ ഉൾപ്പെടെ വ്യാപകമാവുകയും അക്രമങ്ങൾ കൂടുകയും ചെയ്യുമ്പോൾ, പ്രതിരോധം തീർക്കേണ്ടത് നാം ഓരോരുത്തരുടെയും കടമയാണ്. അതിനുള്ള ജനകീയ സംവാദ വേദി തുറക്കുകയാണ് ട്വന്റിഫോർ.

വിവിധ മേഖലകളിലുള്ളവരുമായി നേരിട്ട് സംവദിച്ച് സമൂഹത്തെ ഗ്രസിക്കുന്ന പ്രശ്നങ്ങൾക്ക് എതിരെ ജനകീയ മുന്നേറ്റം സാധ്യമാക്കാനുള്ള ഉദ്യമമാണ് എസ്കെഎൻ40 റോഡ് ഷോ. യുവാക്കളെ കുടുക്കുന്ന അദൃശ്യമായ ലഹരി വലയുടെ കണ്ണികള്‍ കണ്ടെത്താനും നാടിനെ വിറപ്പിക്കുന്ന അക്രമങ്ങൾ ഒഴിവാക്കാനുമുള്ള ക്രിയാത്മകമായ ചര്‍ച്ചകള്‍ റോഡ് ഷോയുടെ ഭാഗമായി നടക്കും.

ലഹരിയില്‍ നിന്ന് കുട്ടികളെ തിരികെപ്പിടിക്കാന്‍ മാതാപിതാക്കളെ അണിനിരത്തി കര്‍മപരിപാടികള്‍ ആലോചിക്കും. ഈ ഉദ്യമത്തിൽ നിങ്ങൾക്കും പങ്കുചേരാം. ആർ ശ്രീകണ്ഠൻ നായരുമായി ആശയങ്ങൾ പങ്കുവെക്കാം.

Story Highlights : SKN 40 campaign 2nd day Alappuzha