ഏഷ്യാ കപ്പിലെ ഇന്ത്യ-പാക് പോരാട്ടം; മത്സരത്തിൽ നിന്ന് ഇന്ത്യ പിന്മാറണമെന്ന് കോൺഗ്രസും പ്രതിപക്ഷ നേതാക്കളും

ക്രിക്കറ്റ് പ്രേമികൾ ഏറെ ആകാംക്ഷയോടെ കാത്തിരിക്കുന്ന ഏഷ്യാ കപ്പ് 2025-ലെ ഇന്ത്യ-പാകിസ്താൻ മത്സരത്തെച്ചൊല്ലി രാജ്യത്ത് രൂക്ഷമായ രാഷ്ട്രീയ പോര്. സെപ്റ്റംബർ 14-ന് യു.എ.ഇ.യിൽ നടക്കാനിരിക്കുന്ന മത്സരത്തിൽ നിന്ന് ഇന്ത്യ പിന്മാറണമെന്ന് കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികളും വിവിധ സംഘടനകളും ആവശ്യപ്പെട്ടിട്ടുണ്ട്. “ബോയ്‌കോട്ട് ഏഷ്യാ കപ്പ്” എന്ന ഹാഷ്ടാഗ് ഉപയോഗിച്ച് ബി.സി.സി.ഐക്കെതിരെ (ബോർഡ് ഓഫ് കൺട്രോൾ ഫോർ ക്രിക്കറ്റ് ഇൻ ഇന്ത്യ) സൈബർ ആക്രമണവും ശക്തമാണ്.

[India-Pakistan clash in Asia Cup]

ഏഷ്യാ കപ്പ് മത്സരക്രമം പ്രഖ്യാപിച്ചതിന് പിന്നാലെയാണ് വിവാദങ്ങൾ തലപൊക്കിയത്. രാജ്യത്ത് നിലനിൽക്കുന്ന ഭീകരവാദ പ്രശ്നങ്ങളുടെ പശ്ചാത്തലത്തിൽ പാകിസ്താനുമായി ക്രിക്കറ്റ് ബന്ധം പാടില്ലെന്നാണ് ഒരു വിഭാഗം ആവശ്യപ്പെടുന്നത്. അടുത്തിടെ നടന്ന വേൾഡ് ചാമ്പ്യൻഷിപ്പ് ഓഫ് ലെജൻഡ്‌സ് (WCL) എന്ന ടൂർണമെന്റിൽ ഇന്ത്യ-പാകിസ്താൻ താരങ്ങൾ തമ്മിലുള്ള മത്സരം ഇന്ത്യൻ താരങ്ങളുടെ പിന്മാറ്റം മൂലം റദ്ദാക്കേണ്ടി വന്നത് ഈ വിഷയത്തിൽ പൊതുജന വികാരം എത്രത്തോളമുണ്ടെന്ന് വ്യക്തമാക്കുന്നതാണ്. പഹൽഗാമിൽ നടന്ന ഭീകരാക്രമണത്തിന് ശേഷം ഇരു രാജ്യങ്ങളും തമ്മിലുള്ള ബന്ധം കൂടുതൽ വഷളായിരുന്നു.

Read Also: വനിതാ ചെസ്സ് ലോകകപ്പ് ഫൈനൽ; കൊനേരു ഹംപി – ദിവ്യ ദേശ്മുഖ് രണ്ടാം മത്സരം ഇന്ന്, കിരീടം ആര് നേടും

ബി.സി.സി.ഐക്ക് രാജ്യതാൽപ്പര്യത്തേക്കാൾ കച്ചവട താൽപ്പര്യമാണ് വലുതെന്ന കടുത്ത വിമർശനവും ഉയർന്നിട്ടുണ്ട്. ഇന്ത്യ-പാക് മത്സരങ്ങൾക്ക് വലിയ സാമ്പത്തിക മൂല്യമുള്ളതുകൊണ്ടാണ് ബി.സി.സി.ഐ ഈ മത്സരത്തിന് വഴങ്ങുന്നതെന്നാണ് പ്രധാന ആരോപണം. 2036-ലെ ഒളിമ്പിക്സ് ആതിഥേയത്വം വഹിക്കാനുള്ള ഇന്ത്യയുടെ നീക്കമാണ് ഇന്ത്യ-പാക് മത്സരങ്ങൾക്ക് ബി.സി.സി.ഐ അനുമതി നൽകിയതിന് പിന്നിലെ യഥാർത്ഥ കാരണമെന്ന് ചില റിപ്പോർട്ടുകൾ. ഒളിമ്പിക് ചാർട്ടർ പ്രകാരം വംശം, മതം, രാഷ്ട്രീയ കാരണങ്ങൾ എന്നിവയുടെ പേരിൽ ഒരു രാജ്യത്തെയും കായിക മത്സരങ്ങളിൽ നിന്ന് വിലക്കാനാവില്ല എന്നതിനാലാണ് ഈ നീക്കം എന്നും വിലയിരുത്തപ്പെടുന്നു.

അതേസമയം ഏഷ്യാ കപ്പ് ഏഷ്യൻ ക്രിക്കറ്റ് കൗൺസിലിന്റെ (എ.സി.സി.) കീഴിൽ നടക്കുന്ന ഒരു ബഹുമുഖ ടൂർണമെന്റാണെന്നും, ഇതിൽ നിന്ന് പിന്മാറുന്നത് അന്താരാഷ്ട്ര തലത്തിൽ ഇന്ത്യക്ക് തിരിച്ചടിയാകുമെന്നും വാദിക്കുന്നവരുമുണ്ട്. നിലവിലെ സാഹചര്യത്തിൽ ബി.സി.സി.ഐക്ക് മുന്നിൽ വലിയ വെല്ലുവിളിയാണ് ഈ വിവാദം ഉയർത്തുന്നത്.

Story Highlights : India-Pakistan clash in Asia Cup; Congress and opposition leaders want India to withdraw from the match