‘കേസ് ഡയറി’; സത്യം തേടിയുള്ള ഒരു സസ്‌പെൻസ് ത്രില്ലർ, നാളെ മുതൽ തിയേറ്ററുകളിലേക്ക്

ബെൻസി പ്രൊഡക്ഷൻസിൻ്റെ ബാനറിൽ കെ.വി. അബ്ദുൾ നാസർ നിർമ്മിച്ച് ദിലീപ് നാരായണൻ സംവിധാനം ചെയ്ത പുതിയ പൊലീസ് ഇൻവെസ്റ്റിഗേഷൻ ത്രില്ലറായ ‘കേസ് ഡയറി’ നാളെ തിയേറ്ററുകളിലേക്ക് എത്തുന്നു. ഒരു കൊലപാതക കേസിലെ ദുരൂഹതകൾ അഴിക്കുന്നതിനൊപ്പം സ്വന്തം ജീവിതത്തിലെ സത്യങ്ങളും തേടിയുള്ള ഒരു ഇൻസ്പെക്ടറുടെ പോരാട്ടമാണ് ഈ ചിത്രം.

ഈ സിനിമയിലെ നായകനായ ഇൻസ്പെക്ടർ ക്രിസ്റ്റി സാം വെറുമൊരു പൊലീസ് ഉദ്യോഗസ്ഥനല്ല. തൻ്റെ സഹോദരൻ്റെ ദുരൂഹമരണത്തിന് പിന്നിലെ യാഥാർത്ഥ്യങ്ങൾ കണ്ടെത്താനുള്ള ദൃഢനിശ്ചയവും അയാൾക്കുണ്ട്. അജ്ജു വധക്കേസ് അന്വേഷിക്കുന്നതിനിടെ നേരിടുന്ന ഓരോ വെല്ലുവിളികളും ക്രിസ്റ്റിയെ തൻ്റെ വ്യക്തിപരമായ ജീവിതത്തിലെ ചില നിഗൂഢതകളിലേക്ക് കൂടി നയിക്കുന്നു. ട്രെയിലറിലൂടെ പ്രേക്ഷകശ്രദ്ധ നേടിയ ചിത്രം ആകാംഷ നിറഞ്ഞ കഥാഗതിയും സസ്‌പെൻസ് നിറഞ്ഞ രംഗങ്ങളും കൊണ്ട് പ്രേക്ഷകരെ ആകർഷിക്കുമെന്നാണ് പ്രതീക്ഷ.

Read Also: രംഗണ്ണന്റെ വേഷം ചെയ്യാൻ പറ്റുന്ന നടിമാരുമുണ്ടിവിടെ ; ദർശന രാജേന്ദ്രൻ

നായകനായ അഷ്കർ സൗദാനെ കൂടാതെ മലയാള സിനിമയിലെ പ്രമുഖ താരങ്ങളായ വിജയരാഘവൻ, രാഹുൽ മാധവ്, റിയാസ് ഖാൻ, സാക്ഷി അഗർവാൾ, നീരജ, അമീർ നിയാസ്, ഗോകുലൻ, കിച്ചു ടെല്ലസ്, ബാല, മേഘനാഥൻ, ബിജുകുട്ടൻ തുടങ്ങിയവർ പ്രധാന കഥാപാത്രങ്ങളെ അവതരിപ്പിക്കുന്നു. ശക്തമായ ഈ താരനിര ചിത്രത്തിൻ്റെ വിജയത്തിന് ഒരു മുതൽക്കൂട്ടാകുമെന്നതിൽ സംശയമില്ല.

ചിത്രത്തിൻ്റെ സാങ്കേതിക മേഖലയും വളരെ മികച്ചതാണ്. പ്രശസ്ത ഛായാഗ്രാഹകൻ പി. സുകുമാർ ഒരുക്കിയ ദൃശ്യങ്ങൾ ചിത്രത്തിന് കൂടുതൽ മികവേകുന്നു. എ.കെ. സന്തോഷിൻ്റെ തിരക്കഥയും, വിവേക് വടാശ്ശേരിയും ഷഹീം കൊച്ചന്നൂരും ഒരുക്കിയ കഥയും ചിത്രത്തെ ഒരു മികച്ച ത്രില്ലറാക്കി മാറ്റുന്നു. വിഷ്ണു മോഹൻസിത്താര, മധു ബാലകൃഷ്ണൻ, ഫോർ മ്യൂസിക്ക് എന്നിവർ ചേർന്നൊരുക്കിയ സംഗീതം ചിത്രത്തിന് ഉണർവ് നൽകുന്നു. ഹരിനാരായണൻ, എസ്. രമേശൻ നായർ, ഡോ. മധു വാസുദേവൻ, ബിബി എൽദോസ് ബി തുടങ്ങിയവരാണ് ഗാനങ്ങൾ രചിച്ചിരിക്കുന്നത്. മലയാള സിനിമയിൽ ഒരു പുതിയ പൊലീസ് ഇൻവെസ്റ്റിഗേഷൻ ത്രില്ലറിന് ഈ ചിത്രം വഴിയൊരുക്കുമെന്ന് സിനിമാപ്രേമികൾ പ്രതീക്ഷിക്കുന്നു.

Story Highlights : ‘Case Diary’; A suspense thriller in search of the truth, in theaters from tomorrow