രാഹുൽ മാങ്കൂട്ടത്തിലിന്റെ സസ്‌പെൻഷൻ കോൺഗ്രസ് നേതൃത്വം എടുത്ത ഉചിതമായ തീരുമാനം; തെറ്റുക്കാരൻ എന്ന് തെളിഞ്ഞാൽ കൂടുതൽ നടപടി ഉണ്ടാകും, വി കെ ശ്രീകണ്ഠൻ എംപി

കോൺഗ്രസ് പാർട്ടിയുടെ ഉന്നത നേതൃത്വം ആലോചിച്ച് എടുത്ത ഉചിതമായ തീരുമാനമാണ് രാഹുലിന്റെ സസ്പെൻഷൻ എന്ന് വി കെ ശ്രീകണ്ഠൻ എം പി. ഒരു പരാതി രേഖാമൂലം ലഭിക്കാതെ നിയമവ്യവസ്ഥയ്ക്ക് മുൻപിൽ വരാതെ ഒരുപാട് പുകമറകൾ സൃഷ്ടിച്ചപ്പോൾ പാർട്ടി ശക്തമായിട്ടാണ് അതിൽ ഇടപെട്ടത്. മറ്റൊരു രാഷ്ട്രീയ പാർട്ടിക്കും ഇതുപോലെ അവകാശപ്പെടാൻ കഴിയില്ല. സംശയത്തിന് അതീതമായിട്ടായിരിക്കണം പൊതുപ്രവർത്തനം എന്ന അജണ്ട വെച്ചുകൊണ്ടാണ് പാർട്ടിയുടെ തീരുമാനം. ഇനി ഇക്കാര്യത്തിൽ പാർട്ടി വിശദമായ അന്വേഷണം നടത്തും.അന്വേഷണം നടത്തി തെറ്റുകാരനാണെന്ന് തെളിഞ്ഞാൽ കൂടുതൽ നടപടി ഉണ്ടാകുമെന്ന് വി കെ ശ്രീകണ്ഠൻ എം പി പ്രതികരിച്ചു.

രാഹുലിനെ വിജയിപ്പിച്ചത് പാലക്കാട്ടെ ജനങ്ങളാണ്. നിരവധി കേസിലെ പ്രതികളായ ആളുകൾ ഇപ്പോഴും നിയമസഭയിലും പാർലമെന്റിലും ഇരിക്കുന്നുണ്ടല്ലോ എന്നും വി കെ ശ്രീകണ്ഠൻ എംപി കൂട്ടിച്ചേർത്തു.

Read Also: ‘രാജി വെക്കേണ്ട ആവശ്യമില്ല; രാഹുലിന് എതിരായ ആക്ഷേപങ്ങളെ ഗൗരവത്തിൽ കാണുന്നു’; സണ്ണി ജോസഫ്

അതേസമയം, ഗുരുതരമായ ലൈംഗിക പീഡന ആരോപണം നേരിടുന്ന രാഹുൽ മാങ്കൂട്ടത്തിലിനെ എംഎൽഎ സ്ഥാനത്ത് നിലനിർത്താനുളള കോൺഗ്രസ് തീരുമാനത്തെ സിപിഐഎം രൂക്ഷമായി വിമർശിക്കുകയാണ്. പെരുമഴ പോലെ ആരോപണങ്ങൾ വന്നുകൊണ്ടിരിക്കുന്ന സാഹചര്യത്തിൽ കർശന നടപടിയെടുക്കാൻ കോൺഗ്രസിന് ഭയമാണെന്നാണ് സിപിഐഎമ്മിൻെറ വിമർശനം . പുറത്തുവന്ന ആരോപണങ്ങളുടെ അടിസ്ഥാനത്തിൽ ധാർമ്മികത ഉയർത്തിപ്പിടിക്കുന്ന തീരുമാനം വേണമെന്ന് സിപിഐഎം സംസ്ഥാന സെക്രട്ടറി എം വി ഗോവിന്ദൻ വ്യക്തമാക്കി.

എന്നാൽ എംഎൽഎ സ്ഥാനത്തുനിന്ന് രാഹുൽ മാങ്കൂട്ടത്തിൽ രാജി വെച്ചാൽ ഉപതിരഞ്ഞെടുപ്പ് ഉണ്ടാകുമെന്ന നിയമോപദേശമാണ് നിലപാട് മാറ്റാൻ കോൺഗ്രസ് നേതൃത്വത്തിനെ പ്രേരിപ്പിച്ചത്. രാജിക്കാര്യത്തെ പിന്തുണയ്ക്കാത്ത കെപിസിസി അധ്യക്ഷൻ സണ്ണി ജോസഫ്, വർക്കിംഗ് പ്രസിഡൻ്റുമാരായ എ.പി അനിൽകുമാർ, ഷാഫി പറമ്പിൽ, പി.സി വിഷ്ണുനാഥ് എന്നിവരുടെ നിലപാടും നിർണായകമായി. രാജി വേണമെന്ന് ആവശ്യത്തിൽ ഉറച്ചുനിന്ന പ്രതിപക്ഷ നേതാവ് വി.ഡി സതീശൻ, രമേശ് ചെന്നിത്തല എന്നിവരെ ഉപതിരഞ്ഞെടുപ്പ് ചൂണ്ടിക്കാട്ടിയാണ് അനുനയിപ്പിച്ചത്. ഉപതിരഞ്ഞെടുപ്പ് നടന്നാൽ ബിജെപി ജയിച്ചേക്കാം എന്നും നേതൃത്വം കണക്കുകൂട്ടുന്നു. ആറു മാസത്തേക്കാണ് രാഹുൽ മാങ്കൂട്ടത്തിലിനെ കോൺഗ്രസിന്റെ പ്രാഥമികാംഗത്വത്തിൽ നിന്ന് സസ്പെൻഡ് ചെയ്തത്. സംഘടന നടപടി ഉയർത്തിക്കാട്ടി പ്രതിരോധിക്കാനാണ് കോൺഗ്രസിന്റെ തീരുമാനം.

Story Highlights : Rahul Mamkootathil suspension is a wise decision taken by the leadership