താമസക്കാരില്ല….10,000 മുറികളുള്ള ലോകത്തിലെ ഏറ്റവും വലിയ ഈ ഹോട്ടലിൽ !!

ഒറ്റ നോട്ടത്തിൽ ഇതൊരു പ്രേതാലയം തന്നെയാണ്. ആളും അനക്കവും ഇല്ല. 70 വർഷം മുമ്പ് നിർമ്മിച്ച 10,000 മുറികളുള്ള ലോകത്തിലെ ഏറ്റവും വലിയ ഈ ഹോട്ടലിൽ ഇന്ന് ആരും താമസമില്ല. ഹിറ്റ്‌ലർ ഭരണത്തിന്റെ ഓർമ്മകൾ പേറുന്നതാണ് ഈ കെട്ടിടം.

ജർമ്മനിയിലെ ബാൾടിക് കടലിൽ സ്ഥിതി ചെയ്യുന്ന റുഗനിൽ ദ്വീപിലെ കടലിനു അഭിമുഖമായിട്ടാണ് ഈ ഹോട്ടൽ പണിതിരിക്കുന്നത്. പ്രോറ എന്ന പേരിലുള്ള ഈ ബീച്ച് റിസോർട്ട് നിർമ്മിച്ചത് ജർമ്മൻ ഏകാധിപതി അഡോൾഫ് ഹിറ്റ്‌ലറുടെ ഉത്തരവ് പ്രകാരമാണ്. നാസിസം പ്രചരിപ്പിക്കുകയായിരുന്നു ലക്ഷ്യം. 1936 നും 1939 നും ഇടയിലാണ് ഈ റിസോർട്ട് പണികഴിപ്പിച്ചത്.എന്നാൽ ഇടക്ക് എപ്പോഴോ പണിപൂർത്തീകരിക്കാൻ കഴിയാതെ പോയി എന്നാണ് ചരിത്രം രേഖപെടുത്തുന്നത്.

ബീച്ചിൽ നിന്നും 150 മീറ്റർ അകലെ സ്ഥിതി ചെയ്യുന്ന ഈ ഹോട്ടൽ സമുച്ചയത്തിന്റെ നീളം 4.5 കിലോമീറ്റർ ആണ്. ഒരേ പോലുള്ള എട്ട് കെട്ടിട്ടങ്ങളായിട്ടാണ് ഹോട്ടൽ നിർമ്മിച്ചിരിക്കുന്നത്. 9,000 തൊഴിലാളികൾ മൂന്ന് വർഷക്കാലം ഹോട്ടലിന്റെ നിർമ്മാണത്തിനായി പണിയെടുത്തിരുന്നു.

20,000 കിടക്കളുള്ള ലോകത്തിലെ ഏറ്റവും വലിയ ഒരു ഹോട്ടലായിരിക്കണം പ്രോറ എന്നാണ് ഹിറ്റ്‌ലർ ആഗ്രഹിച്ചിരുന്നത് എന്നാണ് ചരിത്ര റിപ്പോർട്ടുകൾ പറയുന്നത്.കെട്ടിട്ടത്തിന്റെ നടുവിലായി ഒരു സൈനിക ആശുപത്രിയുണ്ടായിരുന്നു.ഹിറ്റ്‌ലർ യുഗം അവസാനിച്ചതോടെ ഈ ഭീമൻ കെട്ടിടവും പതിയെ വിസ്മൃതിയിൽ ആകുകയായിരുന്നു.