ആലിംഗന വിവാദം ഒത്തുതീർന്നു

മുക്കോല സെന്റ് തോമസ് സെൻട്രൽ സ്‌കൂളിലെ വിദ്യാർത്ഥികളുടെ ആലിംഗന വിവാദം ശശി തരൂർ എംപിയുടെ മധ്യസ്ഥതയിൽ ഒത്തുതീർന്നു. വിദ്യാർത്ഥികളെ പരീക്ഷ എഴുതിക്കാമെന്നും മാനേജ്‌മെന്റ് സമ്മതിച്ചു.

സംഗീത മത്സരത്തിൽ വിജയിച്ച സഹപാഠിയായ പെൺകുട്ടിയെ ആൺകുട്ടി അഭിനന്ദിച്ച് ആലിംഗനം ചെയ്തതിന്റെ പേരിൽ ഇരുവരേയും സസ്‌പെൻഡ് ചെയ്തത് വൻ വിവാദമായിരുന്നു.

സസ്‌പെൻഷനിലായിരുന്ന ദിവസത്തെ ഹാജർ സംബന്ധിച്ച് സിബിഎസ്ഇ ബോർഡിൽ നിന്ന് അനുമതി വാങ്ങാൻ സ്‌കൂൾ അധികൃതർ തന്നെ മുൻകൈ എടുക്കണമെന്നും ചർച്ചയിൽ ധാരണയായിട്ടുണ്ട്.

അതേസമയം, ഇതുസംബന്ധിച്ച് ബാലാവകാശ കമ്മിഷനിൽ നൽകിയ പരാതി വിദ്യാർഥികൾ പിൻവലിക്കും.