‘വികലാംഗൻ’ എന്ന വാക്ക് റെയിൽവേ ഒഴിവാക്കുന്നു

റെയിൽവേയുടെ കൺസെഷൻ ഫോമിൽ ‘വികലാംഗൻ’ എന്ന വാക്ക് എടുത്തുമാറ്റുന്നു. പകരം ‘ദിവ്യാംഗ്’ എന്നാകും ഇനി ഉപയോഗിക്കുക. ‘ദൈവത്തിന്റെ ശരീരം’ എന്നാണ് ‘ദിവ്യാംഗ്’ എന്ന വാക്കിന് അർത്ഥം. രണ്ടു വർഷം മുൻപ് ശാരീരിക വെല്ലുവിളികൾ നേരിടുന്നവരെ അഭിസംബോധന ചെയ്ത് സംസാരിക്കവേ പ്രധാനമന്ത്രി നരേന്ദ്രമോഡിയാണ് ‘ദിവ്യാംഗ്’ എന്ന പദം ഉപയോഗിച്ചത്.

ശാരീരിക വൈകല്യങ്ങൾ നേരിടുന്നവരെ അഭിസംബോധന ചെയ്യുന്ന മറ്റ് പദങ്ങളിലും റെയിൽവേ മാറ്റങ്ങൾ വരുത്തിയിട്ടുണ്ട്. ഇതുപ്രകാരം ‘അന്ധൻ’ എന്ന വാക്കിന് പകരം ‘കാഴ്ചഹാനി സംഭവിച്ചയാൾ’ എന്നാകും ഉപയോഗിക്കുക. ‘ബധിര/മൂക’ വാക്കുകൾക്ക് പകരം ‘സംസാരത്തിനും കേൾവിക്കും ഹാനി സംഭവിച്ചയാൾ’ എന്നാകും സൂചിപ്പിക്കുക. ഫെബ്രുവരി ഒന്നു മുതൽ ഈ മാറ്റങ്ങൾ കൊണ്ടുവരാനാണ് നീക്കം.