മതസ്ഥാപനത്തിന്റെ ചുറ്റുമതിലിൽ യുവാവിന്റെ തല അറുത്തുവെച്ച നിലയിൽ

തെലങ്കാനയിൽ യുവാവിന്റെ തല അറുത്തുമാറ്റിയ നിലയിൽ കണ്ടെത്തി. ബോട്ടുഗുഡ പ്രദേശത്തെ മതസ്ഥാപനത്തിന്റെ മതിലിന് മുകളിലായിട്ടാണ് യുവാവിന്റെ തല അറുത്തുമാറ്റിയ നിലയിൽ കാണപ്പെട്ടത്. ട്രാക്ടർ ഡ്രൈവറായ പി. രമേഷ് എന്ന 25കാരനാണ് കൊല്ലപ്പെട്ടതെന്ന് പൊലീസ് തിരിച്ചറിഞ്ഞു.

പുലർച്ചെ നടക്കാനിറങ്ങിയവരാണ് മതിലിന് മുകളിൽ തല കണ്ടെത്തിയത്. തുടർന്ന് ഇവർ പൊലീസിനെ വിവരമറിയിക്കുകയായിരുന്നു.

ഞായറാഴ്ച രാത്രി മരുന്ന് വാങ്ങാനായി വീട്ടിൽ നിന്ന് പുറപ്പെട്ടതിനുശേഷം ഇയാൾ അജ്ഞാതരായ ആളുകളാൽ കൊല്ലപ്പെടുകയായിരുന്നുവെന്നാണ് പൊലീസിന്റെ നിഗമനം. എല്ലാ ഭാഗത്തുനിന്നും അന്വേഷണം പുരോഗമിക്കുന്നുണ്ടെന്ന് കേസ് അന്വേഷിക്കുന്ന പൊലീസ് ഉദ്യോഗസ്ഥൻ പറഞ്ഞു.