ഇവരെ കരയിപ്പിച്ചാല്‍, മാപ്പില്ല

 
ജനുവരി 30, 2018കാസര്‍ഗോഡ് നിന്ന് ഇന്നലെ  ഒരു തീവണ്ടി , നിറയെ വേദനകളുമായി തിരുവനന്തപുരത്തേക്ക് തിരിച്ചു.
ദുരിതബാധിതരും അവരുടെ കുടുംബാംഗങ്ങളും  പുലര്‍ച്ചെ തലസ്ഥാനത്ത് എത്തി.രാവിലെ സെക്രട്ടറിയേറ്റിന് മുന്നില്‍ ഒത്തുചേര്‍ന്നു. അവര്‍ക്കൊപ്പം ദയാബായി അടക്കമുള്ള സാമൂഹിക പ്രവര്‍ത്തകരും ചേര്‍ന്നു . ‘കേരളം ഭരിക്കുന്നത് മനുഷ്യരാണോ ?’ എന്ന് ദയാബായി ചോദിക്കുമ്പോള്‍, തൊട്ടടുത്ത് ദുരിത ബാധിതയായ ഒരു പെണ്‍കുട്ടി ചാനല്‍ ക്യാമറകള്‍ക്ക് മുന്നില്‍ കൈ വീശുന്നുണ്ടായിരുന്നു. അന്യന്റെ വേദനകള്‍ സ്വന്തം  വേദനയായി കരുതുന്ന കമ്യൂണിസ്റ്റുകാര്‍ കേരളം ഭരിക്കുമ്പോള്‍ ഇത് ഉണ്ടാകാന്‍ പാടില്ലാത്തതാണ്. നിങ്ങള്‍ മനുഷ്യരാണോ എന്ന് ഭരണകൂടത്തോട് ആരും ചോദിക്കാന്‍ അവസരം ഉണ്ടാക്കിക്കൂടാ. സര്‍ക്കാര്‍ ദുരിതബാധിതര്‍ക്ക് ഒപ്പമാണ് എന്ന് അവര്‍ക്ക് കൂടി തോന്നേണ്ടതുണ്ട്. തലസ്ഥാനത്ത് കാഴ്ചവസ്തുവായി ഇവര്‍ മാറിയാല്‍ ഓര്‍ക്കുക, അതിന്റെ പാപഭാരം ബഹുമാനപ്പെട്ട മുഖ്യമന്ത്രീ അങ്ങേയ്ക്ക് കൂടിയാണ്.
ദുരന്തം വന്ന വഴി

1976-2000 കാലഘട്ടത്തില്‍ ആണ് കാസര്‍കോട്ടെ പ്ലാന്റേഷന്‍ കോര്‍പ്പറേഷന്റെ കശുവണ്ടി തോട്ടങ്ങളില്‍ വ്യാപകമായി എന്‍ഡോസള്‍ഫാന്‍ പ്രയോഗം നടന്നത്.തലയ്ക്ക് മീതെ പറന്ന ഹെലികോപ്ടറുകള്‍ ചീറ്റിയ വിഷം ഒരു തലമുറയെ മുഴുവന്‍ മൃതപ്രായരാക്കി.2001-ലാണ് ദുരന്തതീവ്രത ലോകമറിയുന്നത്.മനുഷ്യാവകാശ കമ്മീഷനും,സംഘടനകളും ദുരന്തമുഖത്ത് എത്തി.പഠനങ്ങള്‍ നടന്നു. 2001-ല്‍ എന്‍ഡോസള്‍ഫാന്‍ രാജ്യത്ത് നിരോധിക്കുകയും ചെയ്തു.പക്ഷേ, സര്‍ക്കാര്‍ കോര്‍പ്പറേഷന്‍ വിതച്ച വിഷബീജങ്ങള്‍  ഒരു നാടിന്റെ മുഴുവന്‍ വേദനയായി ഇപ്പോഴും തുടരുന്നു.
എന്തുകൊണ്ട് സമരം ?

എന്‍ഡോസള്‍ഫാന്‍ ദുരിത ബാധിതരുടെ ലിസ്റ്റ് തയ്യാറാക്കിയപ്പോള്‍ പലരും അതിന് പുറത്തായി. ഇരകളെ കൈകളില്‍ എടുത്ത് ബന്ധുക്കള്‍ ചോദിക്കുന്നു, എന്തിനാണ് തെളിവ് വേണ്ടതെന്ന്. കൊടുക്കാമെന്ന് പറഞ്ഞ നഷ്ടപരിഹാരം മുഴുവനായി ഇതുവരെ ലഭ്യമായിട്ടില്ല. പ്രാദേശികമായ മെഡിക്കല്‍ സൗകര്യം എന്ന വാഗ്ദാനവും പൂര്‍ണ്ണമായി നടപ്പിലായില്ല.ഏറെ കാത്തിരുന്നു, സര്‍ക്കാര്‍ കണ്ണ് തുറക്കുമെന്ന് പ്രതീക്ഷിച്ച്. ഒന്നുമുണ്ടായില്ല. സമരമല്ലാതെ മറ്റുവഴിയില്ല. അതിനി മരിക്കുംവരെ എങ്കില്‍, അങ്ങനെ.
സര്‍ക്കാര്‍ പറയുന്നത്
രിതബാധിതര്‍ക്ക് ഒപ്പം തന്നെ. ദുരിതബാധിതരുടെ ലിസ്റ്റില്‍ ഉള്‍പ്പെടാത്തവര്‍ക്ക് വരെ സഹായം നല്‍കി.127 പേര്‍ക്ക് ഇത്തരത്തില്‍ 1 ലക്ഷം രൂപ വീതം നല്‍കി. ഓണത്തിന് എല്ലാ ദുരിത ബാധിതര്‍ക്കും ആയിരം രൂപാ വീതം നല്‍കി. 450 കോടിയുടെ സഹായം കേന്ദ്രത്തോട് ആവശ്യപ്പെട്ടിട്ട് മറുപടിയില്ല. 110 പേര്‍ക്കായി 1 കോടി 32 ലക്ഷം രൂപ വിതരണം ചെയ്തു. ഇത്തരത്തില്‍, 56 കോടി 76 ലക്ഷം രൂപ 3,550 പേര്‍ക്കായി വിതരണം ചെയ്തു.

പിന്‍കുറിപ്പ്
എന്തിനും ഏതിനും മുഖ്യമന്ത്രി രാജിവയ്ക്കണമെന്ന് പറയുന്നവര്‍ക്ക് ഒപ്പമല്ല ലേഖകന്‍.മുഖ്യമന്ത്രിയെ വ്യക്തിപരമായി ഇതിന്റെ പേരില്‍ കുറ്റപ്പെടുത്തുന്നവരോട് യോജിക്കുന്നുമില്ല. മുഖ്യമന്ത്രിയോട് ശക്തമായി വിയോജിക്കുന്നതും വാക്കുകള്‍ ഉദ്ധരിച്ചതും  അദ്ദേഹമൊരു കമ്യൂണിസ്റ്റുകാരനായത് കൊണ്ടാണ്.