ഡോള്‍ഫിനുകള്‍ ചത്തൊടുങ്ങി; മരണകാരണം രണ്ട് വര്‍ഗങ്ങള്‍ തമ്മിലുള്ള ആക്രമണമെന്ന് ഗവേഷകര്‍

മെക്‌സിക്കന്‍ തീരത്ത് ഡോള്‍ഫിനുകള്‍ കൂട്ടത്തോടെ ചത്തൊടുങ്ങി തീരത്തടഞ്ഞു. ദക്ഷിണ മെക്‌സിക്കോയിലെ ബാജാ കാലിഫോര്‍ണിയ ഉപദ്വീപിലാണ് സംഭവം. ഒരു ഡോള്‍ഫിന്‍ വര്‍ഗത്തിനെതിരെ മറ്റൊരു ഡോള്‍ഫിന്‍ വര്‍ഗം നടത്തിയ ആക്രമണമാണ് ചത്തൊടുങ്ങാനുള്ള കാരണമെന്ന് സമുദ്ര ഗവേഷകര്‍ അറിയിച്ചു. 54 ഓളം ഡോള്‍ഫിനുകള്‍ കരയിലേക്കെത്തി. അതില്‍ 33 എണ്ണത്തിന് ജീവനുണ്ടായിരുന്നു. അവയെ തിരികെ കടലിലേക്ക് അയച്ചു. 21 ഓളം ഡോള്‍ഫിനുകളാണ് ചത്തൊടുങ്ങിയത്. ചത്ത ഡോള്‍ഫിനുകളുടെ ജഡത്തില്‍ കടിയേറ്റ പാടുകള്‍ ഉണ്ടായിരുന്നു.