ശുഹൈബിന്റെ കൊലപാതകം; പ്രതിഷേധം ശക്തമാക്കി കോണ്‍ഗ്രസ്

കണ്ണൂരില്‍ യൂത്ത് കോണ്‍ഗ്രസ് പ്രവര്‍ത്തകന്‍ വെട്ടേറ്റു മരിച്ച സംഭവത്തില്‍ പോലീസ് നിഷ്‌ക്രിയരായി നോക്കിനില്‍ക്കുകയാണെന്നും പ്രതികളെ പിടികൂടാതെ സര്‍ക്കാര്‍ കേസ് അട്ടിമറിക്കാന്‍ ശ്രമിക്കുകയാണെന്നും ആരോപിച്ച് കോണ്‍ഗ്രസ് വന്‍ പ്രതിഷേധവുമായി രംഗത്ത്. പ്രതിഷേധ സൂചകമായി കോണ്‍ഗ്രസ് പാര്‍ട്ടി നിരാഹാരസമരം നടത്തും. കോണ്‍ഗ്രസ് നേതാവ് കെ. സുധാകരന്‍ തിങ്കളാഴ്ച മുതല്‍ നിരാഹാരസമരം ആരംഭിക്കുമെന്ന് അറിയിച്ചിട്ടുണ്ട്. കേസ് അന്വേഷിക്കുന്ന പോലീസ് മറ്റാരുടെയോ താല്‍പര്യങ്ങള്‍ക്കനുസരിച്ച് പ്രവര്‍ത്തിക്കുകയാണെന്നും കോണ്‍ഗ്രസ് ആരോപിച്ചു. സിപിഎമ്മിനെ പ്രതിസ്ഥാനത്തു നിര്‍ത്തുന്ന രീതിയിലാണ് കോണ്‍ഗ്രസ് പ്രതിഷേധപ്രവര്‍ത്തനങ്ങളുമായി രംഗത്തെത്തിയിരിക്കുന്നത്.