നിയമസഭയില്‍ ഗ്രനേഡ് ഉയര്‍ത്തി കാണിച്ച് തിരുവഞ്ചൂര്‍

ഷുഹൈബ് വധത്തെ കുറിച്ച് നിയമസഭയില്‍ ചൂടേറിയ ചര്‍ച്ചകള്‍ നടക്കുന്നതിനിടയില്‍ ഗ്രനേഡ് ഉയര്‍ത്തി കാണിച്ച് മുന്‍ ആഭ്യന്തര മന്ത്രിയും കോണ്‍ഗ്രസ് നേതാവുമായ തിരുവഞ്ചൂര്‍ രാധാകൃഷ്ണന്‍. യൂത്ത് കോണ്‍ഗ്രസ് പ്രവര്‍ത്തകര്‍ക്കെതിരെ പോലീസ് പ്രയോഗിച്ചതാണെന്നു പറഞ്ഞാണ് തിരുവഞ്ചൂര്‍ ഗ്രനേഡ് ഉയര്‍ത്തി കാണിച്ചത്. സംസ്ഥാനത്ത് പോലീസ്‌രാജാണ് ഇപ്പോള്‍ നടക്കുന്നതെന്ന് തിരുവഞ്ചൂര്‍ കുറ്റപ്പെടുത്തി. എന്നാല്‍, ഗ്രനേഡ് ഉയര്‍ത്തികാണിച്ചതിനെതിരെ മുഖ്യമന്ത്രി പിണറായി വിജയന്‍ തന്നെ രംഗത്തെത്തി. ഗ്രനേഡ് സ്‌ഫോടനശേഷിയുള്ളതാണെങ്കില്‍ തിരുവഞ്ചൂരിന്റെ നടപടി ഗുരുതരമാണെന്ന് പിണറായി വിജയന്‍ ചൂണ്ടിക്കാട്ടി. അതേതുടര്‍ന്ന് തിരുവഞ്ചൂര്‍ ഗ്രനേഡ് സുരക്ഷാ ഉദ്യോഗസ്ഥര്‍ക്ക് കൈമാറി.