ലൈറ്റ് മെട്രോ; സര്‍ക്കാര്‍ അലംഭാവം കാണിച്ചിട്ടില്ലെന്ന് മന്ത്രി സുധാകരന്‍

ലൈറ്റ് മെട്രോ വിഷയത്തില്‍ സര്‍ക്കാരിനെതിരെ വിമര്‍ശനങ്ങളുന്നയിക്കുന്നവര്‍ യാഥാര്‍ത്ഥ്യം മനസ്സിലാക്കാതെയാണ് സംസാരിക്കുന്നതെന്ന് പൊതുമരാമത്ത് മന്ത്രി ജി. സുധാകരന്‍. ലൈറ്റ് മെട്രോ വിഷയത്തില്‍ സര്‍ക്കാര്‍ അലംഭാവം കാണിച്ചിട്ടില്ല. ആരോപണമുന്നയിക്കുന്നവര്‍ അത് തെളിയിച്ചാല്‍ ചര്‍ച്ചയ്ക്കു തയ്യാറാണെന്നും മന്ത്രി പറഞ്ഞു. പുതിയ മെട്രോ നയം വരുന്നതിനു മുന്‍പു തന്നെ കേന്ദ്രത്തിന് സംസ്ഥാനം കത്തയച്ചിട്ടുള്ളതാണ്. ഇത് എല്ലാവര്‍ക്കും അറിയാവുന്നതാണ്. ഇതറിയാവുന്ന ഇ. ശ്രീധരനും വെറുതെ വിമര്‍ശനങ്ങളുന്നയിക്കുകയാണ്. ഈ വിഷയത്തില്‍ സര്‍ക്കാരിനെ കുരുക്കില്‍ വീഴ്ത്താമെന്ന് ആരും കരുതേണ്ടതില്ലെന്നും മന്ത്രി കൂട്ടിച്ചേര്‍ത്തു.