നിപ വൈറസ് വ്യാജപ്രചാരണം; ജേക്കബ് വടക്കുംചേരിക്കും മോഹനന്‍ വൈദ്യര്‍ക്കും എതിരെ കേസെടുത്തു

നിപ വൈറസ് ബാധയുമായി ബന്ധപ്പെട്ട് നവമാധ്യമങ്ങളില്‍ വ്യാജപ്രചാരണം നടത്തിയ രണ്ട് പേര്‍ക്കെതിരെ പോലീസ് കേസെടുത്തു. മോഹനന്‍ വൈദ്യര്‍ക്കും ജേക്കബ് വടക്കുംഞ്ചേരിക്കുമെതിരെയാണ് തൃത്താല പോലീസ് കേസെടുത്തിരിക്കുന്നത്. സ്വകാര്യ ആയുര്‍വേദ ഡോക്ടര്‍മാരുടെ സംഘടന നല്‍കിയ പരാതിയിലാണ് കേസ് എടുത്തത്. സോഷ്യല്‍ മീഡിയ വഴി നിപ വൈറസുമായി ബന്ധപ്പെട്ട് ഇരുവരും തെറ്റായ ചില പ്രചരണങ്ങള്‍ നടത്തിയിരുന്നു. സോഷ്യല്‍ മീഡിയ ദുരുപയോഗിച്ച് നിപയുമായി ബന്ധപ്പെട്ട് വ്യാജപ്രചാരണങ്ങള്‍ നടത്തുന്നവര്‍ക്കെതിരെ നടപടി സ്വീകരിക്കുമെന്ന് ആരോഗ്യമന്ത്രി കെ.കെ. ശൈലജ നേരത്തേ പറഞ്ഞിരുന്നു.