തങ്ങളുടെ അജണ്ടയ്ക്ക് മുന്നില്‍ ആചാരങ്ങളും വിശ്വാസങ്ങളും പ്രാധാന്യമുള്ളതല്ലെന്ന് സംഘപരിവാര്‍ തെളിയിച്ചു: ദേവസ്വം മന്ത്രി

വിശ്വാസികളെയും അയ്യപ്പഭക്തരെയും വലച്ചുകൊണ്ട് ഹര്‍ത്താല്‍ നടത്തിയ ബിജെപിയും സംഘപരിവാറും തങ്ങളുടെ അജണ്ടയ്ക്ക് മുമ്പില്‍ വിശ്വാസങ്ങളും ആചാരങ്ങളും ഒന്നും പ്രാധാന്യമുള്ളതല്ലെന്ന് തെളിയിച്ചതായി ദേവസ്വം മന്ത്രി കടകംപള്ളി സുരേന്ദ്രന്‍. വൃശ്ചികം ഒന്നിന് ഹര്‍ത്താല്‍ പ്രഖ്യാപിക്കുക എന്നത് കേട്ടുകേള്‍വിയില്ലാത്ത കാര്യമാണ്. പതിനായിരകണക്കിന് വിശ്വാസികള്‍ ശബരിമലയിലേക്ക് എത്തുന്ന ദിവസമാണ് വൃശ്ചികം ഒന്ന്. അന്യസംസ്ഥാനത്തുനിന്നും നിരവധി ഭക്തരാണ് ഈ ദിവസം ശബരിമലയിലേക്ക് എത്തുക. ഹിന്ദു മതവിശ്വാസികള്‍ പവിത്രമായി കാണുന്ന ഒരു ദിനം കൂടിയാണ് വൃശ്ചികം ഒന്ന്. എന്നാല്‍, ഇത്തരം കാര്യങ്ങളൊന്നും പരിഗണിക്കാതെയാണ് ഹര്‍ത്താലിന് ആഹ്വാനം ചെയ്തത്. വിശ്വാസങ്ങളും ആചാരങ്ങളും തങ്ങളുടെ അജണ്ടയ്ക്ക് മുമ്പില്‍ ഒന്നുമല്ലെന്ന് സംഘപരിവാറും ബിജെപിയും തെളിയിച്ചിരിക്കുന്നതായും മന്ത്രി ഫേസ്ബുക്ക് പോസ്റ്റില്‍ കുറിച്ചു.

വൃശ്ചികം ഒന്നിന് ഹര്‍ത്താല്‍ പ്രഖ്യാപിക്കുക എന്നത് കേട്ടുകേള്‍വിയില്ലാത്ത കാര്യമാണ്. ശബരിമല മണ്ഡലകാലം തുടങ്ങുക മാത്രമല്ല, സംസ്ഥാനത്ത് മിക്ക ക്ഷേത്രങ്ങളിലും ചിറപ്പ് മഹോത്സവം തുടങ്ങുന്നതും ഇന്നാണ്. അയല്‍സംസ്ഥാനങ്ങളില്‍ നിന്നും നമ്മുടെ സംസ്ഥാനത്ത് നിന്നുമുള്ള പതിനായിരകണക്കിന് തീര്‍ത്ഥാടകര്‍ മണ്ഡലകാലം തുടങ്ങുന്ന വൃശ്ചികം ഒന്നിന് ശബരിമലയിലേക്ക് ദര്‍ശനം നടത്താന്‍ എത്തുന്നതാണ്. ഹിന്ദു മത വിശ്വാസികള്‍ പവിത്രമായി കാണുന്ന ദിനവുമാണ് വൃശ്ചികം ഒന്ന്. എന്നാല്‍ ഇത്തരമൊരു പരിഗണനയും കൂടാതെ വൃശ്ചികം ഒന്നാം തീയതി പുലര്‍ച്ചെ ഹര്‍ത്താല്‍ പ്രഖ്യാപിക്കുകയാണ് ഹിന്ദു ഐക്യവേദിയും, ബിജെപിയും ചെയ്തിരിക്കുന്നത്. തങ്ങളുടെ അജണ്ടയ്ക്ക് മുമ്പില്‍ ആചാരങ്ങളും വിശ്വാസങ്ങളും ഒന്നും പ്രാധാന്യമുള്ളതല്ലെന്ന് ബിജെപിയും സംഘപരിവാരവും ഒരിക്കല്‍ കൂടി തെളിയിച്ചിരിക്കുകയാണ് ഈ ഹര്‍ത്താലിലൂടെ.