കണ്ണൂരിൽ നൈറ്റ് പട്രോളിങ്ങ് ശക്തമാക്കി പോലീസ്

കണ്ണൂരിലുണ്ടായ ആക്രമണങ്ങളുടെ പശ്ചാത്തലത്തിൽ നൈറ്റ് പട്രോളിങ്ങ് ശക്തമാക്കി പോലീസ്.

എഎൻ ഷംസീർ എംഎൽഎയുടെയും സിപിഎം മുൻ ജില്ലാ സെക്രട്ടറി പി ശശിയുടേയും വീടിന് നേരെ ബോംബേറ് ഉണ്ടായി. അതിന് പിന്നാലെ ഇരിട്ടിയിൽ ഡിവൈഎഫ്‌ഐ പ്രവർത്തകന് വെട്ടേറ്റിട്ടുണ്ട്. സംഭവത്തിന് പിന്നിൽ ആർഎസ്എസ് ആണെന്ന് സിപിഎം ആരോപിച്ചു.

അതേസമയം, ഡി.വൈ.എഫ്.ഐ അഖിലേന്ത്യാ വൈസ് പ്രസിഡന്റ് എ.എൻ ഷംസീർ എം.എൽ.എയുടെ വീടിന് നേരെ ഉണ്ടായ ആർ.എസ്.എസ് ബോംബേറ് അപലപനീയവും പ്രതിഷേധാർഹവുമാണെന് ഡി.വൈ.എഫ്.ഐ സംസ്ഥാന സെക്രട്ടറിയേറ്റ് പ്രസ്താവനയിൽ പറഞ്ഞു. സംസ്ഥാനത്തുടനീളം ആർ.എസ്.എസ് നടത്തുന്ന ആക്രമണങ്ങളുടെ തുടർച്ചയാണ് എ.എൻ.ഷംസീറിന്റെ തലശ്ശേരിയിലെ വീടിന് നേരെ നടന്ന ബോംബേറ്. ഇത്തരത്തിലുള്ള ആക്രമങ്ങളുമായി ആർ.എസ്.എസ് മുന്നോട്ടുപോയാൽ കനത്ത വില നൽകേണ്ടിവരും. സംഘപരിവാറിന്റെ അക്രമ രാഷ്ട്രീയത്തിനെതിരെ പ്രതിഷേധം ഉയർത്തികൊണ്ടുവരുമെന്നും സംസ്ഥാന സെക്രട്ടറിയേറ്റ് പ്രസ്താവനയിൽ പറഞ്ഞു.