പ്ലസ് ടു പരീക്ഷയിൽ പരാജയപ്പെട്ടതിനെത്തുടർന്ന് വിദ്യാർത്ഥിനി ആത്മഹത്യ ചെയ്തു

പ്ലസ് ടു പരീക്ഷയിൽ പരാജയപ്പെട്ടതിനെത്തുടർന്ന് വിദ്യാർത്ഥിനി ആത്മഹത്യ ചെയ്തു. പിലാക്കാട്ടിരി പൂവക്കൂട്ടത്തിൽ ബാലകൃഷ്ണൻ-വിമല ദമ്പതികളുടെ മകൾ ഭവ്യ (17) യാണ് ബുധനാഴ്ച രാവിലെ പത്തരയോടെ ദേഹത്ത് തീ കൊളുത്തി ആത്മഹത്യ ചെയ്തത്.

പെരിങ്ങോട് ഹയർ സെക്കണ്ടറി സ്‌കൂളിലെ വിദ്യാർത്ഥിനിയാണ്. നന്നായി പഠിച്ചിരുന്ന കുട്ടിയാണെന്നാണ് നാട്ടുകാരും, അധ്യാപകരും പറയുന്നത്. പക്ഷെ ഈ വർഷത്തെ പരീക്ഷയിൽ ഇംഗ്ലീഷ് പരീക്ഷക്ക് പരാജയപ്പെട്ടിരുന്നു. ഇതേത്തുടർന്നാണ് ആത്മഹത്യയെന്നാണ് കരുതുന്നത്. മറ്റെന്തെങ്കിലും കാരണങ്ങളുണ്ടോ എന്ന് വ്യക്തമല്ല. മൃതദേഹം നിലവിൽ കുന്നംകുളത്തെ ഒരു സ്വകാര്യ ആശുപത്രിയിൽ മോർച്ചറിയിലാണ്. തൃശൂർ മെഡിക്കൽ കോളെജിൽ പോസ്റ്റ്‌മോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടുനൽകും.