ആനയ്ക്ക് പകരം എഴുന്നള്ളിച്ചത് ‘ആനവണ്ടിയെ’; കൊട്ടാരക്കരയിലെ ഒരു ഉത്സവ കാഴ്ച

ആനക്ക് പകരം എഴുന്നള്ളിച്ചത് ആനവണ്ടിയെ. കൊട്ടാരക്കരയിലായിരുന്നു കെഎസ്ആർടിസി ബസിനെ ആനയ്ക്ക് പകരം എഴുന്നള്ളിച്ച കൗതുക കാഴ്ച അരങ്ങേറിയത്. ശ്രീ മഹാഗണപതി ക്ഷേത്രത്തിലെ മേടതിരുവാതിര മഹോത്സവത്തോടനുബന്ധിച്ചായിരുന്നു സംഭവം.

കെഎസ്ആർടിസി കൊട്ടാരക്കര ഡിപ്പോയിലെ മൊബൈൽ വർക്ക് ഷോപ്പാണ് ഉത്സവത്തിന് ബസിനെ എഴുന്നള്ളിച്ചത്. നെറ്റിപ്പട്ടം കെട്ടിച്ച് പൂമാലയും തോരണങ്ങളും ബലൂണുകളുമൊക്കെയായി അലങ്കരിച്ച് ഗജരാജപ്രൗഢിയോടെയായിരുന്നു ആനവണ്ടി എത്തിയത്. ആനവണ്ടി എഴുന്നള്ളിപ്പ് കാണാൻ നിരവധിയാളുകളാണ് റോഡിനിരുവശവും തടിച്ചുകൂടിയത്.

കൊട്ടാരക്കര കെഎസ്ആർടിസി വർഷം തോറും ഉത്സവാഘോഷങ്ങളുടെ ഭാഗമാകാറുണ്ട്. വ്യത്യസ്തമായി എന്തെങ്കിലും ചെയ്യണമെന്ന ചിന്തയിലാണ് ആനവണ്ടിയെ ആനയാക്കി എഴുന്നള്ളിച്ചത്.